CSI Educación reclama a la conseyería "un plan específicu" pa facer l'asturianu vehicular

"El sistema educativu ye una de les ferramientes básiques pa protexer y normalizar una llingua en peligru de desapaecer", recuerda'l sindicatu.

Llueu de conocer la posición de la conseyera Lydia Espina de nun dar continuidá al Plan Pilotu esperimental de Promoción del Usu del Asturianu porque, argumenta, "xurídicamente nun se pue dir más allá al nun l’asturianu llingua cooficial", la estaya d'Educación de la Corriente Sindical d'Izquierda (CSI) amuesa "la nuestra sorpresa y el nuestru refugu énte estes declaraciones". "En primer llugar, abúltanos sorprendente que la Conseyería nun quiera da-y vida a un plan que tuvo, según responsables de la propia Alministración, bonos resultaos en tolos centros onde se desendolcó. Ye ablucante que’l que defende ser el 'gobiernu más asturianista de la historia' nun defenda la presencia de les llingües propies d’Asturies nes aules d’Asturies", empecipió.

"Esti plan sirvió pa ver cómo, en dellos centros educativos d’Asturies, l’asturianu podía emplegase como llingua vehicular en distintes asignatures. L’usu del asturianu nun suponía nengún perxuiciu pa los escolinos, sinón tolo contrario: pudieron decatase d’esta manera de que la llingua que munchos d’ellos falaben fuera de les aules tamién sirvía pa esplicar cualesquier materia, pa falar de cualesquier tema, con tola importancia qu’esto podía tener pa la so autoestima llingüística", valoró darréu'l sindicatu, que recuerda que "tolos espertos tán d’alcuerdu en que’l sistema educativu ye una de les ferramientes básiques pa protexer y normalizar una llingua en peligru de desapaecer".

Por esti motivu, CSI Educación esixe "a los responsables políticos que diseñen un plan específicu nesti sen. Un plan que nun seya yá pilotu, sinón una realidá en tolos centros educativos".

Tratu con dignidá

Esta cuestión nun ye la única qu'esmolez al sindicatu, que reclama tamién la creación de la especialidá docente, un aumentu de les hores llectives en toles etapes educatives, la creación del Departamente de Llingua Asturiana/Gallego-asturiano nos centros o la inclusión de la materia na Formación Profesional. Asina, demanda "un cambiu na forma d’actuar de la Conseyería d’Educación y del Gobiernu al completu, tratando a les llingües propies d’Asturies cola dignidá que merecen", ensin escaecer la declaración d'oficialidá.

Na semeya, Espina nuna intervención nel Plenu d'esta mañana na Xunta Xeneral.