Educación asoleya les midíes de proteición pa la prueba B2 d'asturianu

L'usu de la mázcara va ser obligatoriu.

La Conseyería d'Educación ta acabante d'asoleyar les midíes de proteición pa les pruebes de certificación d'idiomes adaptaes al Marcu Común Européu de Referencia pa les Llingües d'esti añu, ente les que ta, per primer vegada, la d’asturianu, que nesta ocasión va ser de nivel B2 intermediu. Los esámenes d’italianu, inglés, alemán y francés van desendolcase ente'l 7 y el 17 de setiembre, mentes que'l de llingua asturianu ta convocáu pal 3 d'ochobre y les xornaes vinientes.

Ente les indicaciones rescampla que "naide nun pue permanecer nel centru ensin mázcara". Tamién se marca'l caltenimientu de la distancia de seguridá interpersonal de 1,5 metros "en tou momentu", el non compartir materiales y l'encamientu de reforciar les midíes d'hixene personales.

D'igual manera, tamién s'espublizaron los protocolos de midíes de seguranza pa los centros qu'acueyen les pruebes.