Educación da otros cinco díes pa pagar les tases del B2 d’asturianu

La “esceicionalidá provocada pola crisis sanitaria y el so impautu nel procesu” lleva a la Conseyería d’Educación a reabrir el plazu pa pagar les tases del B2 d’asturianu pa la prueba convocada a partir del 3 d’ochobre. Les persones con plaza que nun fixeren el trámite tienen agora cincos díes más, hasta’l llunes.

Güei taba previsto la espublización del llistáu d’inscripción provisional pa la prueba de certificación d’asturianu adaptada al Marcu Común Européu de Referencia pa les Llingües de nivel B2 intermediu. Sicasí, el BOPA d’ayeri espublizó una resolución de la conseyería del miércoles pola que se reabre’l plazu pa pagar les tases del esame y entregar el xustificante a los centros d’inscripción, pasu últimu ésti que s’afala a facer de manera electrónica.

Nun primer momentu, depués de qu’en marzu se suspendiera’l procesu depués de trés díes abiertu pola declaración del estáu d’alarma por cuenta la pandemia de COVID-19, decretóse del 1 al 10 de xunu’l plazu nuevu de pagu. Agora, dada la “esceicionalidá provocada pola crisis sanitaria y el so impautu nel procesu”, Educación decide reabrilu de cara a aquelles persones que, por cualquier cuestión, nun pudiera facelo en tiempu.

El llunes ye’l día cabero pa ello, yá que la resolución da cinco díes hábiles a partir de la xornada siguiente de la espublización nel BOPA. La llista provisional, finalmente, asoleyaráse’l día 13.

300 persones ensin plaza

Unes 800 persones matriculáronse pa la primer prueba d’asturianu adaptada al marcu européu, prevista nun primer momentu del 21 al 29 de mayu, de los que namái 500 algamaron plaza a partir d’un sortéu teniendo en cuenta les dos primeres lletres de los apellíos de los aspirantes a certificar el so nivel d’asturianu. Les feches nueves, énte la imposibilidá d’entamase la prueba pola crisis sanitaria, afitáronse pal 3 d’ochobre, día de celebración del bloque 1, mentes que los esámentes del bloque 2 van facese a partir del 5.

Na semeya, l'uvieín IES Aramo, onde se van desendolcar les pruebes del bloque 2 del B2.