Dóblense los contaxos na selmana última

|
Vacunación segunda dosis nel Palaciu a menores de 65 años con Janssen

Los casos nuevos pasen de 29 diarios de media a 70. Namái'l vienres rexistráronse 103.

A la baxada de positivos que se vivió na selmana del 8 al 14 de payares qu'invitaba a un mayor optimismu na evolución de la pandemia siguió-y na pasada un aumentu importante de contaxos, doblando les cifres: de 270 pasóse a 491. La Conseyería de Salú retomó'l vienres la comunicación diaria de los datos y too paez indicar que tamos viviendo l'entamu de la quinta fola de COVID-19 nel país.

Les cifres aportaes recueyen 47 casos el llunes, 46 el martes, 84 el miércoles, 77 el xueves, 103 el vienres, 73 el sábadu y 65 el domingu. Ye una media diaria de 70 positivos, cantidaes que se manexaben nel mes d'agostu.

Asina, na selmana del 16 al 22 d'esi mes rexistráronse 77 casos diarios de media. La evolución d'esti datu dende l'entamu de la cuarta fola foi la siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32 y 29, hasta los 70 actuales.

Aumenta tamién la hospitalización

Nos trés díes últimos medraron enforma tamién les hospitalizaciones, pasando de 36 a 57. En planta hai 48 ingresaos, 19 más que'l xueves, y 9 na UCI, 2 más.

Nun se rexistró muerte nenguna na fin de selmana. Otra manera, l'indíce acumuláu a 14 díes ye agora de 59 casos cada 100.000 habitantes, cuando na actualización última taba en 55.

Na semeya, vacunación ayeri nel xixonés Palaciu de Deportes de la segunda dosis a menores de 65 años que recibieren la monodosis de Janssen.

Contador Estadistiques