“Contamos con dalgunes empreses interesaes na inversión nes dos plantes” d’Alcoa, confirma Maroto, que dará prioridá a les de capital español

La ministra Reyes Maroto confirmó na Comisión d'Industria, Comerciu y Turismu del Congresu celebrada esti miércoles que esisten “dalgunes empreses interesaes na inversión nes dos plantes” d’Alcoa. Hasta’l 1 de xunetu ta garantizáu la totalidá del emplegu nes instalaciones d'Avilés y A Coruña.

Anque yá anunciara de la esistencia d’interés poles dos factoríes a primeros de selmana, la socialista insisitió ayeri, na so intervención na Cámara Baxa pa esplicar les midíes qu’aportará l’Executivu central énte’l pieslle de dos de les trés factorías de fabricación d’aluminiu d’Alcoa, na intención de merca de delles firmes, pa darréu señalar que dará prioridá a les de capital español cola intención de que “vengan pa quedase”. Tanto’l Gobiernu d’Asturies como la Xunta de Galicia van encargase, de manera independiente, de buscar un plan industrial pa caúna de les plantes allugaes nel so territoriu y de llevar les negociaciones, siempre baxo la tutela de Madrid, según apuntó ayeri Maroto.

Mientres tanto, los trabayadores siguen demandando al Gobiernu estatal la ellaboración del Estatutu de les Empreses Lletrointensives, que consideren clave pa la concreición d’ufiertes pa dambes plantes. La previsión d’Industria ye que llegue al Congresu nun plazu de 2 meses, esto ye, n’abril.