Los trabayadores d'Alcoa aprueben l'alcuerdu cola empresa que paraliza los despidos hasta xunetu

El Gobiernu estatal tien seis meses pa buscar inversores pa les plantes d'Avilés y A Coruña.

De los 312 trabayadores asturianos con derechu a votu, 266 votaron sí al alcuerdu al que llegaran los representantes sindicales cola multinacional estauxunidense la selmana pasada cola oposición única de Confederación Intersindical Galega (CIG), lo que supón un 91,41 por cientu del total, con 19 'non', 5 en blancu y 1 nulu. Nel casu de los gallegos, el porcentaxe quedó nun 90,5 por cientu.

Dichu alcuerdu afitaba que diba caltenese l'emplegu hasta'l 1 de xunetu, momentu nel que, de nun llegar inversores, dexaría activa namái les fundiciones y la torre de pasta, lo que reduciría la plantiya d'Avilés a 91 persones. Éstos son los que siguirán nel so puestu de trabayu, porque los restantes de les series de lletrolisis van facelo hasta'l 1 de marzu, momentu nel que se van apagar les cubes, pasando estos emplegaos a recibir un plan de formación remuneráu hasta la fecha marcada.

Nel casu de qu'hubiere compradores, Alcoa comprométese a invertir 20 millones en cada planta pa la so puesta a puntu. Dende los sindicatos afalen al Gobiernu a entainar les conversaciones y a zarrar l'Estatutu de les Empreses Lletrointensives pronto pa facilitar la operación.