El Gobiernu estatal yá finó'l borrador del Estatutu de les Empreses Lletrointensives

La vicesecretaria del PSOE, Adriana Lastra, anuncia qu'hai cuatro proyeutos interesaos nes plantes d'Alcoa d'Avilés y A Coruña.

Manuel Monterrey, direutor xeneral d'Industria y Telecomunicaciones, participó esta mañana en Madrid na reunión de la comisión de siguimientu de los alcuerdos pol caltenimientu de l'actividá nestes dos factoríes de la multinacional estauxunidense. Nella recibió la confirmación del Ministeriu d'Industria, Comerciu y Turismu de la finalización del reclamáu borrador del Estatutu de les Empreses Lletrointensives, que'l Gobiernu va estudiar pa proponer alegaciones, poniendo'l focu "na tarifa llétrica que correspuende a esti tipu d'industria", lo que pal Executivu asturianu ye "el datu importante".

Monterrey recibió tamién información sobre'l númberu d'empreses con intención d'invertir nes plantes d'Avilés y A Coruña d'Alcoa. Anque nun dio datos al respeuto, l'asturiana Lastra sí fixo declaraciones esta mañana, asegurando qu'esisten cuatro proyeutos sobre la mesa del Gobiernu estatal.