Compromís entruga nel Senáu por qué Correos sigue incumpliendo la toponimia tradicional asturiana

Carles Mulet, senador de Compromís, rexistró’l llunes una entruga escrita al Gobiernu al traviés de la presidencia de la Cámara Alta sobre l’incumplimientu por parte de Correos de la toponimia tradicional asturiana, única oficial en 74 de los 78 conceyos del país. L’Executivu estatal tien 30 díes pa dar respuesta a esta cuestión.

El castellonenc dio esti pasu al conocer la vieya demanda del usuariu de Twitter de nome Xovellanos –al traviés d’un segundu, Ricard J.–, que lleva más de cuatro años y diez meses diariamente llanzando a la empresa postal la pregunta “¿piensen n’actualizar la toponimia d’Asturies de les aplicaciones?”, ensin respuesta. “Hai topónimos que va más de 20 años que tán aprobaos y @CorreosAtiende sigue usando los non oficiales nes sos aplicaciones. Si quies mandar un paquete a Les Bories nes sos etiquetes namái hai opción de poner ‘Borias’”, esplicaba-y el perfil de chancia del ilustráu xixonés el domingu a Mulet, que menos de 24 hores depués yá tenía rexistrada la entruga.

En concreto, l’escritu inclúi trés: “¿Por qué motivu Correos nun respeta la toponimia oficial d’Asturies? ¿Qué midíes, y en qué plazu, van adoptase pa solucionar esta situación? ¿Qué midíes va adoptar l’Alministración Xeneral del Estáu pa respetar en tolos ámbitos les denominaciones oficiales n’Asturies?”. Un xestu nuevu del senador de Compromís pa col asturianu, que l’añu pasáu algamó 290.000 euros pa la promoción del idioma llueu d’una enmienda a los Presupuestos Xenerales del Estáu na Cámara Alta que pidía 1,6 millones pa toles llingües del Estáu.

Na semeya, Mulet nuna intervención nel Senáu.