Mulet recibe una carta d'agradecimientu de l'ALLA pol so llabor

La institución abre les puertes del so llar social al senador de Compromís, qu'entamó delles xestiones parllamentaries a favor del asturianu.

L'Academia de la Llingua Asturiana (ALLA) unvió a Carles Mulet una carta d'agradecimientu pol so llabor. Firmada pol presidente Xosé Antón González Riaño, cuenta con fecha del 16 de marzu, pero'l castellonenc diola a conocer esta mañana en redes sociales xunto cola imaxe d'un corazón encarnáu p'amosar la so allegría pol detalle.

"Perconociendo les tos xestiones parllamentaries siempre a favor de la pluralidá cultural, de la nuesa llingua y de l'Academia de la Llingua Asturiana, quiero espresate l'agradecimientu d'esta institucion y ufiertate, en dalguna ocasión que visites Asturies, la posibilidá de conocer el nuesu trabayu de primer mano", espresa. Magar que sía senador por designación de les Corts Valencianes, formando parte del Grupu Parllamentariu de la Izquierda Confederal, Mulet vien toa esta llexislatura, asina como l'anterior, entamando iniciatives a favor del asturlleonés, la última'l reconocimientu de la toponimia oficial por parte de Correos llueu d'una entruga al respeuto qu'aceleró la cuestión, amosando un compromisu ausente dafechu nos seis senadores asturianos.

Na semeya, Mulet nuna intervención nel Senáu.

❤️ pic.twitter.com/B06wBgMhhv

— Carles Mulet Garcia (@carlesmulet) March 28, 2023