Correos anuncia que va entamar a respetar la toponimia oficial

17 años depués de l’aprobación de los primeros decretos qu’oficializaben la toponimia tradicional de conceyos asturianos, Correos va entamar a respetar el so usu. La empresa pública anunció que yá entamó col procesu d’actualización de les sos bases de datos, qu’espera tener completáu nel primer trimestre del 2023.

“Correos comenzará a utilizar nos sos sistemes la toponimia asturiana: les cartas, paquetes y notificaciones que s’unvíen dende les oficines postales van incluyir nes direiciones la nomenclatura tradicional”, comunicó esta mañana Leire Díez Castro, direutora de Rellaciones Institucionales, depués d’aconceyar con Berta Piñán, conseyera de Cultura, Política Llingüística y Turismu, y Antón García, direutor xeneral de Política Llingüística, que se desplazaron hasta Madrid pa tratar esti asuntu. Pa ello, según esplicó, ye necesario que l’Instituto Nacional de Estadística (INE) faiga les modificaciones necesarias nel so Nomenclátor pa que los sistemes de Correos puedan actualizase colos nomes de llugar correutos en sustitución de los yá derogaos, n’usu entovía por parte d’alministraciones estatales.

Esta reivindicación de Política Llingüística que Correos fai efeutiva agora –yá ta activa en delles aplicaciones colos conceyos que sí tán actualizaos nel INE– aceleróse cola entruga escrita fecha pol senador del partíu valencianu Compromís, Carles Mulet, al Gobiernu estatal al traviés de la presidencia Senáu sobre l’incumplimientu de la empresa postal. Foi llueu de conocer, al traviés del usuariu de Twitter Ricard J. de la pregunta diaria fecha por otru, de nome Xovellanos, “¿piensen n’actualizar la toponimia d’Asturies de les aplicaciones?” a la cuenta oficial de Correos per cuasi 5 años, siempre ensin respuesta.

La del Executivu llegó’l 18 d’ochobre, dexando cayer como escusa la non finalización del procesu de recuperación topónima, con 4 de los 78 conceyos pendientes d’aprobar el so espediente. Sicasí, espón la so disposición a usar los yá oficializaos “en cuanto sía posible”, lo que se confirma güei llueu del alcuentru de Díaz Castro colos responsables de Política Llingüística del Gobiernu asturianu.

Na semeya, García, Díez, Piñán y Julio González, secretariu xeneral y del conseyu d'alministración de Correos, na sede de la empresa postal en Madrid.