El VI Premiu Nel Amaro, qu’estrena web, entra na so fase de festival

|
Páxina Premiu y Festival Nel Amaro

Llega ochobre y con él el meyor teatru nes llingües propies del país. El VI Premiu Nel Amaro de Teatru Profesional en Llingua Asturiana y Gallego-asturiano entra na so fase de festival cola representación de les cuatro obres finalistes d’esta edición, que se van representar los vienres del mes nel uvieín Teatru Filarmónica con entrada llibre.

Kamante Teatro va ser la primera en defender la so propuesta, ‘Con M mayúscula’, pa siguir el día 14 con ‘Les madreñes vacíes’, de Carlos Alba; el 21 con ‘Aventurina l’ablana’, de Factoría Norte; y el 28 con ‘La sierva patrona’, de Nun Tris Producciones. Toles representaciones, que coinciden nesta ocasión en tar orientaes a un públicu infantil o mozu, van ser a les 18 hores.

Un xuráu va encargase d’escoyer, depués de ver en direuto les obres, cuála ye la merecedora de los 6.000 euros d' esti premiu que tien l'oxetivu "de consolidar, enriquecer y prestixar la llingua asturiana y l’eonaviego nel ámbitu del arte dramáticu". El Nel Amaro, que reconoz al artista de Quentuserrón fináu nel 2011, cuenta como novedá esti añu con una páxina web con tola información sobre esta edición y los sos finalistes, asina como del mierense y los cinco ganadores anteriores.

Alba foi’l primeru en llevalu, nel 2017, con ‘Llázaro de Tormes’, mentes que nel 2018 y el 2020 recibiólu Higiénico Papel Teatro con ‘Hansel y Gretel’ y ‘El viaxe de Covaletti’, siendo Factoría Norte el vencedor nel 2019 por ‘Les rellaciones peligroses’. L’añu pasáu estrenóse Nun Tris con ‘La reina la guapura de Leenane’.

 

Contador Estadistiques