“Bolado dexónos trés llibros que lu sitúen con derechu propiu ente la meyor poesía asturiana contemporánea”, afirma García

“Yera una persona de munches facetes, y toes d’un gran valor, toes mui importantes”, apuntó Antón García, direutor xeneral de Política Llingüística, na inauguración de la XLIV Selmana de les Lletres Asturianes, dedicada al poeta y críticu lliterariu Xosé Bolado. L’actu sirvió tamién de presentación del llibru conmemorativu ‘Xosé Bolado. Fálame Duce’ y la estrena del documental ‘Na firida del cementu. Vida y obra de Xosé Bolado’, que va emitir el martes pela nueche TPA.

El salón d’actos del Centru de Cultura Antiguu Institutu, magar l’horariu, axuntó a un bon piñu de xente p’acompañar a García y a les dos coordinadores d’esta edición de la Selmana de les Lletres, Marta Mori y Ana Lamela, pa esta primer cita de la gran fiesta de la nuesa lliteratura. Xunto a ellos, en representación del Conceyu, l’edil de Cultura, Manuel Ángel Vallina, que calificó a Bolado como una “persona querida y reconocida en Xixón”, medaya d’oru de la villa nel 2021, “ciudadanu dispuestu a poner siempre so granín pa facer de Xixón una ciudá más social, comprometida, tolerante y abierta”.

Aprovechó’l García p’agradecer el llabor de la Oficina de Normalización Llingüística de Xixón y “el compromisu de la corporación”, un “exemplu pa tolos conceyos asturianos”, enantes de recordar que “44 años va qu’un grupu de xente se reunía nel salón d’actos del Museú de Belles Artes d’Asturies pa celebrar per primer vez d’una manera oficial, con una convocatoria que fexo la desapaecida Diputación Provincial de Oviedo, les lletres asturianes. Yo taba ente’l públicu; veo persones que sí taben recitando naquel momentu naquel primer día”.

“Impresiona un poco, cuando llegaba al Antiguu Institutu, nel que coincidí tantes veces en tantos actos con Bolado, ver esa pancarta que se despliega cola so imaxe, impresionante. Ye emotivo pa mi”, confesó García, qu’esplicó que “nun puedo dicir que tuviera una relación d’amistá mui cercana a Bolado, pero la primer vez que quedé con él foi pa una publicación, un homenaxe qu’organizó l’Atenéu Obreru de Xixón a Federico García Lorca y pidió la mio colaboración”, que dató pal 1987 o 1988. Nella “había trés collaboraciones n’asturianu que yeren de Vicente García Oliva –presente na sala– y Teresa González”, amás de la propia, “trés poemes traducíos al asturianu. Y a partir d’ehí conicidimos en munchísimos sitios siempre alredor de la llingua asturiana y la lliteratura”.

MC, Atenéu Obreru y Academia de la Llingua

“Bolado yera una persona de munches facetes, y toes d’un gran valor, toes mui importantes”, siguó. “En tiempu seguramente una de les primeres foi l’activismu sindical, como activista políticu tamién. Ye fundador del Movimiento Comunista de Asturias, famosu MC, partíu políticu que seguramente nun llogró esa representación insitucional pero que foi fundamental”. Nesi sen, apuntó que “una de les banderes que llevaba’l MC foi la llingua asturiana. Seguramente ye’l primer partíu d’izquierdes qu’apostó decididamente por que se reivindicara la llingua asturiana como una seña d’identidá d’Asturies”.

Tamién citó la so contribución a la recuperación del Atenéu Obreru de Xixón y “l’apueste que fixo pola lliteratura” al traviés de les sos coleiciones de poesía Deva, la revista ‘Lúnula’ o Tiempu de Cristal, “coleición específica n’asturianu”. Y el llabor desendolcáu como académiu de l’Academia de la Llingua Asturiana, “onde dexó una contribución maraviyosa qu’entovía se caltién, que ye la revista ‘Lliteratura’”.

Sobre’l so papel como poeta rescampló que “nel arranque del sieglu XXI, nuna edá na que nun ye habitual qu’un autor s’estrene escribiendo poesía, Bolado cambia de llingua: da’l pasu d’escribir n’asturianu. Quiero pensar que seguramente porque reside en Madrid y añora esa llingua cola que llevaba munchos años trabayando naquelles publicaciones. Ye en Madrid onde la recupera como llingua lliteraria dexándonos trés llibros maraviyosos que lu sitúen con derechu propiu ente la meyor poesía asturiana contemporánea”.

Pa finar la so intervención, García, qu’escusó l’ausencia de la conseyera Berta Piñán pola imposibilidá de llegar a tiempu de Ponga, onde tuvo llugar el Conseyu de Gobiernu esta mañana, y confirmó la so presencia nel actu de mañana nel xixonés Muséu Nicanor Piñole (presentación a les 12 hores del lllibru ‘Palabres blanques. Testos d’historia crítica y lliteraria de Xosé Bolado’) faló de la obra conmemorativa de la Selmana de les Lletres, coordinada por Mori, que “pon en contestu históricu y social, lliterariu tamién, a la persona”, y faise acompañar de munches ilustraciones gracies a “l’arrogancia cola que compartieron esi material gráficu” la familia de Xosé Bolado, l’Atenéu Obreru de Xixón, José Javier González y Olaya Pazos, citó García.

Tamién del documental, dirixíu por Lamela, a la que felicitó, al igual qu’a Mori, por “esi llabor permanente de somorguiase na personalidá y na obra de Xosé Bolado”.

“Lo único que podía reparar un poco lo munchísimo que lu tábemos echando en falta”

Mori, coordinadora de los dos llibros que se publiquen nesti homenaxe, tamién agradeció al Conceyu de Xixón “el trabayu que faen pol asturianu” y a la conseyería “que me diera la oportunidá de facer esti trabayu que me permitió acercame una vez más a la figura de Bolado, al que-y tanto debo en munchos aspectos”. “Dexónos nel 2021, nel mesmu añu se publicó una antoloxía billingüe coordinada pola crítica lliteraria Esther Muntañola”, al que siguieron dellos homenaxes de l’Academia, del Atenéu Obreru… “Too ello vese que yera poco, porque cuando la conseyería anunció l’añu pasáu que-y dedicaba la Selmana de les Lletres, toos y toes tuvimos la sensación de que yera lo único que podía reparar un poco lo munchísimo que lu tábemos echando en falta”.

Pela so parte, Lamela apuntó que “faime muncha ilusión conocer a Bolado más que la parte poética” al ellaborar el documental, nel que foi mui difícil resumir “en namás 40 minutos d’un home tan polifacéticu, tan interesante y tan cultu; cómo foi’l poeta, el críticu, el políticu, l’axitador cultural”. Un “home de bona intención, de gustos esquisitos, de pallabres y xestos tan seductores” que, confesó, llevóla, “lleendo la so poesía y falando colos sos allegaos”, a “tener la fuerza cuasi máxica de crear a lo primero d’esti añu 2023 una tertulia de muyeres, de muyeres artistes, nun espaciu seguru y afayadizu pa falar de proyectos, de sentires y de la vida en xeneral. De xuru qu’a Bolado-y encantaría”.

P’acabar proyeutóse’l la pieza audiovisual, na que participen José Luis Argüelles, la propia Mori, Berta Piñán, Lourdes Álvarez, Pablo Texón, Cheni Uría, Paz Fernández Felgueroso, Fernando Menéndez, Jorge Fernández León, Paz Fonticiella, Xosé Antón González Riaño y Esther Muntañola. Ésta, que va emitise’l martes pela nueche en TPA, estructúrase en trés partes: Paisaxes, Pallabres y Firíes.

Na semeya, Lamela, García, Vallina y Mori.