'Xosé Bolado. Fálame duce', el llibru conmemorativu de la XLIV Selmana de les Lletres Asturianes

"Esti trabayu permitióme acercame una vez más a la figura de Bolado, al que tanto-y debo en munchos aspeutos", apuntó la coordinadora de la obra, Marta Mori, que detalló'l so conteníu.

'Xosé Bolado. Fálame duce’ ye'l títulu de la obra conmemorativa de la XLIV Selmana de les Lletres Asturianes, dedicada al poeta y críticu lliterariu, que lleva "un versu que ta sacáu d’un poema especialmente guapu d’esti autor", apuntó la tamién escritora na inauguración de les actividaes celebrada'l vienres nel xixonés Antiguu Institutu. "Yo lo qu’intenté foi primero poner al autor en contestu. Pa munchos yera una figura que conocíemos de siempre; yera una figura omnipresente en tolo que fuera acción lliteraria, artística en xeneral, pero sobre too acción lliteraria en Xixón", esplicó.

Pa ello contó cola collaboración d'Irene Díaz y Arantxa Margolles, "que creo que yeren lo meyor que podíemos tener". "El llibru entama con un capítulu d’Irene Díaz que lo que fai ye describir la situación de Xixón en plenu procesu de desindustrialización al que llega Xosé Bolado a vivir a finales de los años 70", esplica, pa siguir con un repasu de Margolles "a cómo foi’l surdimientu del movimientu de recuperación de la llingua asturiana y cómo Bolado s’acerca a esti movimientu y se compromete cada vez más con él y cómo, por exemplu, dende los trabayos que s’exercíen nel Atenéu Obreru la preocupación asturianista tuvo presente dende lo primero".

"Depués d’estes aportaciones que falen del contestu vamos alcontrar testos guapísimos escritos dende una perspectiva muncho más suxetiva, dende’l cariñu y l’amistá, como ye’l testu qu’escribe Cheni Uría, compañeru de fatigues polítiques nos años 70 y 80 nel MCA pero primero n’otres organizaciones; el qu’escribe Vicente García Oliva, que diz que cuando s’alcuerda d’él nun-y vien un Bolado, vien-y distintos ‘Bolados’ que va alcontrandose en distintos momentos en distintes situaciones y nel que taba siempre él trabayando".

Pero tamión la collaboración de Luis Pascual "que nos fala de l’aportación de Xosé Bolado al Atenéu Obreru de Xixón, importantísima aportación cultural", o otra d’Ana Cano "onde nos fala de l’aportación que fixo a l’Academia de la Llingua Asturiana, que nun foi poca, porque foi de los primeros en dar clase nos Cursos de Branu de l’Academia, primer axente d’enseñanza del asturianu, antes mesmamente de que l’asturianu tuviera nes escueles y institutos, y alfabetizó n’asturianu a munchísima xente mayor" y la puesta en marcha de la revista ‘Lliteratura’, "con un conseyu de redaición estraordinariu".

La visión de la mocedá que nun lu conoció

"La última parte del llibru ta dedicada a artículos", siguió Mori, "dalgunos a medies ente la perspectiva y la critica lliteraria, como ye’l Pablo Antón Marín Estrada, que fala de lo que significó pa él como poeta mozu la esistencia de Bolado. Depués tenemos l’artículu de José Luis Argüelles, Esther Muntañola y Diego García Solís. Los dos primeros aporten análisis mui valiosos del conocimientu de la obra poética de Bolado, conócenla de memoria porque, ente otres coses, foron antólogos y tuvieron la oportunidá de recoyela como antoloxíes2.

Y nel casu de García Solís, "más orixinal porque ufierta’l puntu de vista de la mocedá que nun conoció a Bolado porque nun vivía n’Asturies pero qu’entamen a conocelu agora y a reconocelu como ún de los mayores poetes de la lliteratura asturiana contemporánea". Complétase'l llibru con una presentación firmada pol presidente Adrián Barbón, por un artículu de la propia Mori entituláu 'Xosé Bolado, in memoriam' y por un testu d'Ana Lamela con 'QR' pa poder sentir al traviés d'un dispositivu móvil poemes del homenxáu musicalizaos por ella mesma.

El vienres, de baldre

'Xosé Bolado. Fálame duce’ ye una obra non venal que va dase de baldre'l vienres, Día de les Lletres Asturianes, cola merca d'un llibru o discu n'asturianu, productos que van contar con un 10 por cientu de descuentu en 57 llibreríes del país. Esti añu participen Aldaba Regalos, Aldebarán, Antares, Casa del Libro (tamién disponen del llibru conmemorativu en gallego-asturiano 'Gladius' del humorista gráficu Ernesto García del Castillo ‘Neto’), Cervantes (tamién en gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Pasa Página, Pintar-Pintar, Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, El Bosque de la Maga Colibrí, La Buena Letra, Central, Clarín, La Habitación Propia, Identidad Secreta, Paradiso, La Revoltosa, Roy, Mundo Sonoro y Musicasturiana.com, en Xixón; Casona, Clarín, Víctor Núñez y Elepé Producciones, n’Avilés; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; La Semeya, en Noreña; Gestión, en Parres; Rima, en Piloña; Sol, en Samartín del Rei Aurelio; y Fnac, La Chimenea y Naredo, en Siero.