La presentación del llibru conmemorativu y d’un documental sobre Bolado abre la XLIV Selmana de les Lletres Asturianes

A esti vienres adelántase la celebración de la XLIV Selmana de les Lletres Asturianes, dedicada al poeta y críticu lliterariu Xosé Bolado baxo'l lema ‘Que les nubes espardan la to voz’. La inauguración oficial va servir de presentación del llibru conmemorativu de la celebración, coordináu por Marta Mori, y un documental sobre la figura homenaxada.

‘Xosé Bolado. Fálame duce’, editada por Trabe, ye’l títulu de la obra dedicada a Bolado, una “semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu”, apunten dende la Conseyería de Cultura, Política Llingüística y Turismu. Ésti va repartise de baldre’l XLIV Día de les Lletres Asturianes, que se celebra’l vienres 5 de mayu, cola merca d’un llibru o discu n’asturianu –que van contar con un descuentu del 10 por cientu– nes 57 llibreríes participantes no que se venía llamando Día del Discu y Llibru n’Asturianu.

L’actu, programáu pal meudía nel salón d’actos del xixonés Centru de Cultura Antiguu Institutu, va completase cola estrena del documental ‘Na firida del cementu. Vida y obra de Xosé Bolado’. Trátase d’una producción creada y dirixida por Ana Lamela.

Esta primer fin de selmana de la gran celebración de la nuesa lliteratura complétase’l sábadu, a les 12 hores nel Muséu Nicanor Piñole, cola presentación del segundu de los llibros que s’asoleyen a partir d’esti homenaxe a Bolado. De nome ‘Palabres blanques. Testos d’Historia y Crítica lliteraria (Esbilla)’, tamién coordináu por Mori y con edición nesti casu por Trea, consiste nuna compilación de los artículos espublizaos pol espertu na so faceta de críticu lliterariu.

Les otres actividaes programaes

El llunes, 1 de mayu, van siguir les actividaes de la XLIV Selmana de les Lletres Asturianes cola puesta n’escena del espectáculu poéticu musical ‘Flores escontra’l desamparu’, baxo la direición de Lamela, que va facer homenaxe a la obra de Xosé Bolado a les 19 hores nel Teatru de la Llaboral con entrada de baldre. Nél van intervenir Carlos Alba, Laura Cuervo, la sopranu Susana Gudín, la flautista Delia Gutiérrez Aranda y el tiorbista Iván Fernández Prieto.

La llingua del occidente va tener protagonismu al día siguiente con una actu nel Audiorio As Quintas d’A Caridá a les 18.30 hores. Tamién se va recordar a Bolado col recital poéticu ‘Hailas’ cola participación de Conchita Álvarez Lebredo, María José Fraga, Marisa López-Diz y el dúu Mestura, que va encargase de poner la banda sonora al alcuentru.

El públicu infantil va participar el miércoles col musical escolar ‘Historia d’un bosque’ de Nacho Fonseca, que va representase a les 10 y a les 12 hores nel Teatru de la Llaboral cola participación de la OSPA, ente otros. Ésti va repetise, baxo’l nome ‘Conciertu de les Lletres’, al día siguiente a les 19.30 hores, agora abiertu a tol públicu.

‘Gladius’ de Neto pal occidente

El vienres festéxase’l Día de les Lletres Asturianes y danse a conocer a los ganadores de los certámenes escolares a les 14 hores. De tarde, fuera de la programación del Gobiernu, l’Academia de la Llingua Asturiana celebra la so Xunta Estraordinaria por esta xornada nel uvieín Teatro Campoamor (19 hores), actu que va servir de recibimientu de David Guardado como académicu de númberu y nel que se va a reconocer a Lourdes Álvares col III Premiu Nacional de Lliteratura Asturiana.

Esti día ye cuando les llibreríes del país ufren un 10 por cientu de descuentu na merca de llibros y discos y entrega de baldre los llibros conmemorativos de la Selmana de les Lletres Asturiana. Asina, los veceros van pode facese con ‘Xosé Bolado. Fálame duce’ y, pal occidente, el cómic en gallego-asturiano ‘Gladius’, del humorista gráficu Ernesto García del Castillo ‘Neto’.

Les llibreríes participantes esti añu son Aldaba Regalos, Aldebarán, Antares, Casa del Libro (tamién disponen del llibru conmemorativu en gallego-asturiano), Cervantes (tamién en gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Pasa Página, Pintar-Pintar, Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, El Bosque de la Maga Colibrí, La Buena Letra, Central, Clarín, La Habitación Propia, Identidad Secreta, Paradiso, La Revoltosa, Roy, Mundo Sonoro y Musicasturiana.com, en Xixón; Casona, Clarín, Víctor Núñez y Elepé Producciones, n’Avilés; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; La Semeya, en Noreña; Gestión, en Parres; Rima, en Piloña; Sol, en Samartín del Rei Aurelio; y Fnac, La Chimenea y Naredo, en Siero.

Pieslle y manifestación

Pa zarrar les actividaes de la XLIV Selmana de les Lletres Asturianes, el sábadu 6 a les 12 hores nel Piñole los poetes más mozos van participar nel alcuentru ‘Fueyes de color infinitu’. El públicu va poder disfrutar de les reflexones y los poemes d’Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez, y el grupu Tierra y Eco va poner música en direuto.

A la mesma hora, la Xunta pola Defensa de la Llingua Asturiana entama n’Uviéu la manifestación pol Día de les Lletres. La reclamación de la oficialidá ye la demanda d’esta marcha que toma salida de la Estación del Norte (RENFE).