"Ye un pasu simbólicu de gran importancia", diz González Riaño sobre la intervención de Barbón

El presidente de l'Academia de la Llingua Asturiana amuesa la so satisfaición pol xestu.

Minutos depués del discursu d'Adrián Barbón nel Plenu d'Investidura, Xosé Antón González Riaño espublizó en Twitter, la rede social qu'emplega, un mensaxe nel que destacaba'l fechu de que'l candidatu a la presidencia d'Asturies emplegara l'asturianu pa falar de los sos planes pa col idioma. "Paez que les coses entamen a camudar: ye la primer vegada qu'un aspirante a la Presidencia del Gobiernu d'Asturies @AdrianBarbon emplega l'asturianu na Xunta Xeneral y failo, amás, pa defender la #oficialidá. Pa nós ye un pasu simbólicu de gran importancia", aseguró.

“La meyor manera d’evitar la desapaición del asturianu ye afitando un modelu propiu d’oficialidá basáu na proteición y el consensu”, defendió'l socialista, que'l llunes va ser investíu presidente del país. P'aprobar la reforma del Estatutu d'Autonomía pa declarala necesita l'apoyu de dalguna de les cuatro formaciones de dereches, que na segunda sesión del Plenu d'Investidura yá amosaron el so refugu a la igualdá de derechos de los falantes d'asturianu colos de castellanu.