Barbón considera que cola creación del foru de presidentes del Cantábricu aumentó’l “pesu específicu d’Asturies nel marcu políticu español”

La creación del Foru Permantente de Presidentes del Cantábricu “supón un enantes y un depués nes rellaciones de les comunidaes autónomes y nel pesu específicu d’Asturies nel marcu políticu español”, considera Adrián Barbón. La xunta de Vitoria-Gasteiz llevó tamién a un consensu pa constituyir una macrorrexón atlántica pa defender con fuercia los intereses comunes na Xunión Europea (XE).

“Si vamos xuníos podremos tener mucho más emburriu pa negociar col Gobiernu d’España, con otros países y cola Comisión Europea”, argumentó’l presidente nuna cita colos medios el día depúes del alcuentru con Iñigo Urkullu, Miguel Ángel Revilla y Alfonso Rueda, dirixentes d’Euskadi, Cantabria y Galicia, de manera respeutiva. El llavianés rescampló l’apoyu públícu de los dos primeros al consensu de gallegos y asturianos con castellanos y lleoneses sobre’l corredor atlánticu del noroeste “y a nós fainos fuertes sofitar la conexón de dos coses vitales pa nós: per un llau’l propiu corredor atlánticu na parte francesa, onde siguen ensin executase les obres y de nada sirve que síamos quién a garantizar la movilidá interior na Península Ibérica nesi corredor atlánticu si llueu eso nun tien conexón con Francia; y tamién el corredor del hidróxenu”.

“Asturies ta estratéxicamente asitiada pa la producción y tresporte del hidróxenu verde, pero ye importantísimo asegurar la conexón con Francia al través de la rexón cantábrica pa facilitar la interconeutividá col restu d’Europa”, precisó. Barbón tamién informó sobre l’alcuentru de trabayu con Galicia del vienres en Taramundi sobre’l retu demográficu, señalando que’l país vecín “tien polítiques interesantes sobre manera nel retornu d’emigración o de descendientes n’Iberoamérica”.

La cita n’Euskadi

N’Ajuria Enea los cuatro territorios bañaos pol Cantábricu apostaron por constituyir una macrorrexón con otros del arcu atlánticu que-yos permita defender con más fuerza los sos intereses énte la XE n’asuntos como les conexones ferroviaries, el retu demográficu o les enerxíes llimpies. Amás alcordaron la creación del Foru Permanente de Presidentes del Cantábricu pa entamar conceyos de calter añal y facer presión política.

Na semeya, Barbón esta mañana momentos enantes de la so intervención.