L’academia vasca reclama que la macrorrexón atlántica tenga ente les sos xeres revitalizar idiomes como l’asturianu

Una oportunidá nel campu de la movilidá y la transición enerxética, pero tamién pa les llingües de la zona. Euskaltzaindia, l’academia vasca, reclama al lehendakari Iñigo Urkullu que se tenga en cuenta a los idiomes minorizaos, citando l’asturianu, a la hora d’afitar les xeres de la macrorrexón atlántica y úfrese a entamar una rede con otres instituciones como l’Academia de la Llingua Asturiana (ALLA).

Nun comunicáu asoleyáu esta mañana, la entidá fundada nel 1918 rescampla que la iniciativa consensuada polos presidentes d’Asturies, Euskadi, Galicia y Cantabria en Vitoria-Gasteiz en marzu “pue ser una oportunidá pa fortalecer los coleutivos de falantes de llingües minorizaes” y “les rellaciones ente ellos, en términos de llingua y cultura, compartir proyeutos, impulsar la investigación y cooperar na tresferencia de conocimientu”. Porque non sólo traería beneficios “nel campu de la movilidá, la transición energética y otros temes”, sinón que tamién serviría “pa visualizar y revitalizar les comunidaes de llingües minorizaes que viven nel Arcu Atlánticu”.

Por esti motivu esixe al presidente vascu que tenga en cuenta esta cuestión a la hora d’afitar les xeres de la macrorrexón. “Nesta zona viven miles de personas de fala gallega, asturiana, vasca, occitana o bretona, y estes comunidaes de falantes tienen realidaes diferentes, dende’l puntu de vista del conocimientu, la dinamización y el reconocimientu”, apunta.

“Del mesmo mou, Euskaltzaindia ta dispuesta, dientro d’esta macrorrexón, a entamar una rede cola Real Academia Galega, l’Academia de la Llingua Asturiana, Lo Congrès Permanent de la Lenga Occitana, Ofis Publik ar Brezhoneg y otres asociaciones y organizaciones, cola fin de facer visibles a les comunidaes llingüístiques minorizaes nes instituciones europees, fortalecer la cooperación ente elles y compartir proyeutos, asina como tresferir el conocimientu acumuláu emplegando, principalmente, les teunoloxíes nueves”.

Na imaxe, Urkullu fala na xunta de Vitoria-Gasteiz con representantes vascos, asturianos, gallegos y cántabras, cola conseyera de Facienda, Ana Cárcaba, y el presidente Adrián Barbón a la so izquierda. Semeya obra d'Armando Álvarez.