El Centru Asturianu de Ḥong Kong unvía 10.500 mázcares pola COVID-19

|
Donación mázcares Centru Asturianu de Ḥong Kong

El material sanitariu llegará a Asturies previsiblemente al final de la selmana.

La Conseyería de Salú confirmó esta mañana la donación por parte del Centru Asturianu de Ḥong Kong de mázcares pa enfrentar la situación por cuenta la COVID-19. En total, van partir güei con direición a Asturies delles caxes con 10.500 unidaes dende esti territoriu autónomu anguaño baxo soberanía china.

Si too trescurre con normalidá, el material llegará al país al final d'esta selmana. Una amuesa de solidaridá de la comunidá asturiana nel esterior que va venir mui bien a los sanitarios que trabayen estos díes pola salú de tola ciudadanía.

Pa canalizar toles iniciatives d'empreses, fundaciones, asociaciones y particulares que quieran donar material pa esta crisis por cuenta'l coronavirus SARS-CoV-2 el SESPA habilita'l corréu electrónicu material.coronavirus@sespa.es.

Diez muertes el llunes

La datos de finaos por COVID-19 n'Asturies medraron de manera significativa esti llunes al algamar la cifra de 10 y colocar el total en 22. Hasta esi momentu morrieren 12 persones.

El númberu total de positivos a les 20 hores d'ayeri foi de 68, cantidá qu'aumenta con respeuto a la del domingu, de 49. Los contaxos nel país lleguen poro a los 662, de los que 23 tán na UCI y 158 en planta, mentes que 30 pacientes consiguieron curar.

Contador Estadistiques