Letizia y Felipe VI reciben na feria de Frankfurt información sobre la historia de la llingua asturiana y música del país

|
Laura Marcos, Letizia y Felipe VI nel puestu d'Asturies na Frankfurter Buchmesse

Los reis d’España participaron esti miércoles na inauguración de la Frankfurter Buchmesse, que tien al Estáu como convidáu d’honor. Llueu del actu fixeron un percorríu pelos diferentes puestos, con parada nel d’Asturies, onde Letizia y Felipe VI recibieron dellos obsequios, como’l catálogu de la esposición ‘Voces’ o’l discu ‘40 años al son de la nuestra música/40 anos al son da nosa música’.

Laura Marcos, escritora y filóloga de la Direición Xeneral de Política Llingüística, ún de los trés autores en llingua asturiana presentes como representación de les nueses lletres nel mayor eventu editorial del mundu, nel qu’Asturies s’estrena, fixo-y entrega de los materiales a Letizia. En concreto foi’l completu catálogu sobre la historia de la llingua asturiana qu’acompañó a ‘Voces. La llingua n’Asturies al traviés de los sieglos ’, muestra coordinada por Xulio Viejo y na que Ramón d’Andrés y Roberto González-Quevedo participaron xunto al filólogu na parte académica; una llibreta de ‘La Casina de la Traducción’, asitiada en Cadavéu, pueblu que los monarques xunto a les sos fíes van visitar el día 29 pa entregar el gallardón de XXXIII Premiu al Pueblu Exemplar d'Asturies; y el discu conmemorativu de la XL Selmana de les Lletres Asturianes, correspondiente al 2019, con 40 cantares n’asturianu y gallego-asturiano de los principales grupos del país.

La uvieína y Felipe VI pudieron conocer el puestu de la Conseyería de Cultura, Política, xestionáu pol Gremiu d’Editores d’Asturies y decoráu con una semeya de la biblioteca universitaria y otra de la naturaleza de la tierra acompañaes por testos emblemáticos de la lliteratura asturiana en toles llingües d'Asturies firmaos por Leopoldo Alas Clarín, Olvido García Valdés, Manuel Asur, Raquel F. Menéndez, Aurora García Rivas y Manuel García-Galano, acompañaos d’una traducción al inglés. Nel mesmu tán presentes diez editoriales y el Serviciu d’Espublizaciones de la Universidá d’Uviéu, y complétase con una pequeña muestra que lleva la propia conseyería con publicaciones de cultura xermánica tornaes al asturianu.

Xunto a Marcos, completen la representación asturiana n’Alemaña Francisco ‘Paco’ Álvarez y Xuan Bello, esti últimu convidá pol Ministeriu de Cultura y Educación, qu’entama una amplia programación nos cinco díes de la Frankfurter Buchmesse compuesta por 200 escritores, traductores o ilustradores. El de Paniceiros va participar el sábadu al meudía, nel nomáu ‘Escenario Cereza’ del pabellón d’España, nel eventu profesional ‘Granta en español 24: Poéticas del lenguaje’ xunto cola madrilana Julia Valero y l’escritor en gallegu Xesús Fraga, amás de la cofundadora de la revista, Valerie Miles.

Na semeya, Marcos fai entrega de los materiales en llingua asturiana a Letizia, qu'observa'l CD.

Contador Estadistiques