Asturies lidera la baxada del paru en xunu

La cantidá total de desemplegaos queda en 55.817 al rexistrar esti mes 2.672 menos.

Asturies enllaza cinco meses de descensu del paru y convirtióse en xunu nel territoriu nel que más baxaron los demandantes d'emplegu, según los datos asoleyaos güei pol Ministeriu de Trabayu y Economía Social. El país vivió una mengua del 4,57 por cientu, mui perriba de la media estatal, que s'asitió nel 1,84 por cientu al rexistrar 50.286 paraos menos que dexen el total en 2.668.842.

Cantabria sigue na llista a Asturies, con un 4,36 por cientu, mentes que Galicia presenta un 4,02. Les cifres más baxes son los de la Comunidad de Madrid (0,80 por cientu), Andalucía (1,24) y Melilla (1,27).

Los bonos datos asturianos vienen pola campaña de branu, yá que'l sector servicios, con 2.313 paraos menos, lidera'l descensu, rescamplando la mengua de Ribeseya (14,78 por cientu), Llanes (10,57) o Ribedeva (9,80). La industria, con una baxada de 200 desemplegaos, tamién ayuda.

En comparanza col añu pasáu, el resultáu tamién ye positivu, acumulando 27 meses de cayida. Asturies tien 4.353 paraos, lo que supone una mengua del 7,23 por cientu, tamién perriba de la media estatal, que s'asitia nel 6,6 por cientu al contar con una baxada 191.740 demandantes d'emplegu.

Illes Balears, con un 17,30 por cientu, presenta les cifres meyores, a la que-y sigue Castiella y Lleón (9,33), mentes que Melilla ye l'únicu llugar onde medra, un 3,62 por cientu.

Siguen aumentando les afiliaciones a la Seguridá Social

A estes cifres bones nel país hai qu'añadir l'aumentu de l'afiliación a la Seguridá Social, rexistrando la cantidá más alta dende'l 2011, un total de 380.198. El mes pasáu taba en 377.992, polo qu'aumentó en 2.206 pesonas, un 0,58 por cientu.

No que respeuta a la contratación, creció'l 17,33 por cientu (24.180). Trés de cada diez foron indefiníes (7.570).