Asturies torna a baxar de los 60.000 paraos llueu d’enllazar cuatro meses de descensu del desemplegu

Mayu finó con 58.489 demandantes d’emplegu, 1.860 menos que’l mes anterior, un descensu lideráu pola industria. Asturies baxa asina de los 60.000 paraos, barrera que nun se superaba dende xunetu, y rexistra la cifra más baxa pa un mes de mayu de los 15 años últimos.

Si n’abril el paru menguaba en 1.347 persones pa dexar el total en 60.349 persones, mayu rexistró cifres entovía meyores. Un cayida del 2,18 qu’en mayu ye del 3,08 por cientu, superior a la media estatal, que quedó nel 1,77 al presentar 49.260 desemplegaos menos y asitiar el total en 2.739.110.

En toles autonomíes baxó’l desemplegu, anque la meyor cifra a nivel estatal ye la d’Illes Balears, un 7,13 por cientu, al la que-y siguen Castilla-La Mancha (4,52 por cientu) y Castilla y Lleón (3,86). Piesllen la tabla Ceuta (0,28), Euskadi (0,67) y Catalunya (0,79).

El descensu n’Asturies de 1.860 paraos dase en tolos sectores, rescamplando la industria con un 4,59 por cientu de baxada. Los conceyos del centru y los más turísticos, sobre manera los del oriente, presenten los meyores datos sofitaos tamién polo servicios.

En términos interañales el país pierde 3.953 paraos, un 6,30 por cientu, práuticamente idéntica a la media estatal, del 6,29 al rexistrar 183.881 menos. Asturies acumula 26 meses siguíos de desecensu nesti indicador.

Xube l’afiliación y la contratación

No que respeuta a l’afiliación na Seguridá Social aumentó en 2.178 persones (0,58 por cientu), hasta les 377.992, cantidá más alta dende’l 2010. N’abril esta cifra taba en 375.814.

La contratación, mentes, creció el 14,30 por cientu con 20.608 nuevos contratos, 2.579 más que los rexistraos n’abril.