Asturies acumula'l cuartu mes de medra del paru

El país zarró payares con 815 desemplegaos más, p'asisitar el total en 70.877.

El paru medró n'Asturies perriba de la media estatal, asitiada nun 0,65 por cientu. El país rexistró un aumentu del 1,16 por cientu, que se concentró en tolos sectores d'actividá, salvo nel de demandantes de primer emplegu, con mayor incidencia nes actividades d'hostelería, na industria d'alimentación y bébores, y en dalgunes rames industriales.

Por conceyos, los mayores crecimientos correspondieron a los de mayor actividá nel sector hosteleru y hoteleru, casu d'Onís (24,14 por cientu), Ribeseya (15,48), Cangues d'Onís (15,03) y Llanes (11,09). A nivel estatal la medra mayor foi n'Illes Balears (22,85 por cientu), rexistrándose les mengües más importantes en Ceuta (2,30) y Euskadi (1,36).

Descensu interañal

Si comparamos los resultaos colos d'hai un añu, les cifres son más positives al rexistrar la cifra más baxa pa un mes de payares dende'l 2008. El númberu de desemplegaos baxó nun añu en 2.480 persones, una cayida del 3,38 por cientu, convirtiéndose Asturies asina na cuarta comunidá autónoma con mayor retrocesu en cifres tres Euskadi (6,36 por cientu), Castilla y Lleón (4,41) y Murcia (4,19), cuando la media estal ta nel 1,68 por cientu.

Esta evolución tuvo la so traducción na afiliación a la Seguridá Social, creciendo'l númberu de cotizantes en 4.562 persones nos doce meses últimos, con una medra porcentual del 1,2 por cientu hasta asitiase en 368.160 al finar payares.

Na semeya, Benia, capital d'Onís.