‘Asturianes’ conviértese n’esposición pa siguir visibilizando a “les muyeres asturianes, esi referente de casa”

El llibru ‘Asturianes’ d’Alicia Álvarez ye agora tamién una esposición. La sala 3 del xixonés Centru de Cultura Antiguu Institutu acueye hasta’l 29 de xineru una muestra, complementada con un ampliu programa d’actividaes, que ta compuesta poles ilustraciones de María Ortiz con testos informativos de les venti muyeres y coleutivos que lu protagonicen y vitrines con oxetos venceyaos a estes referentes.

La conceyala de Cultura, Mocedá y Museos, Ana Montserrat López Moro, conduxo la inauguración celebrada esta mañana, na que tuvo presente l’autora y María Xosé Rodríguez López, responsable de la Oficina de Normalización Llingüística de Xixón, entamadora de la esposición ‘Asturianes’ xunto cola Universidá Popular. Liliana Fernández-Peña, xefa del departamentu de la UP, y Aitor Martínez Valdajos, direutor de la Fundación Municipal de Cultura, Educación y Universidá Popular, acudieron tamién a un actu con numberosu públicu, ente elles dalgunes de les persones que van participar activamente nos eventos complementarios a la muestra, como Pilar Sánchez Vicente o Ana Cifuentes.

“Queremos reinvindicar el papel de les muyeres asturianes que participaron de manera fundamental na construcción de la nuestra historia dende’l sieglu XII al sieglu XXI, caúna a la so manera y coles circunstancies que-yos tocó vivir. Aida Lafuente, Margarita Salas, Corín Tellado, les cigarreres de Cimavilla, Xosefa Xovellanos, La Busdonga, Julia Alcayde o María Luisa García son dellos de los nomes que formen esta selección que dende distintes estayes y diferentes momentos históricos, contribuyeron colos sos llogros a abrir camín y dar voz a les que nun teníen o se-yos negaba”, arrancó la edil de Foro, que recordó les dificultaes pa “descubir los nomes de les muyeres que constituyeron esi camín” al ser homes los qu’avezaben a escribir la historia.

“Por supuesto esisten biografíes femenines”, siguió, “pero los nomes repítense, apúrrensenos los mesmos referentes femeninos pa tol planeta. L’asuntu complícase a la hora d’atopar referentes femeninos nel nuestru entornu cercanu, na nuesa realidá diaria, de proximidá”. Por esti motivu, “abúltanos mui importante reivindicar la identidá, universu, y cómo non, lo llocal. Queremos que les neñes y los neños reconozan quién foron y qué fixeron les xixoneses Xosefa Xovellanos, Corín Tellado, Les Comadres, Isabel de Noreña, les cigarreres, Julia Alcayde, les xugadores de ḥoquei del Hostelcur – agora Telecable por cuestiones de patrociniu–, Rosario Acuña...”.

Y al empar, “damos cumplimientu, a dalgo mui importante pa nosotros, al Plan de Normalización vixente nel Conceyu de Xixón, en concreto a la estaya de ‘Enseñanza, tresmisión familiar y mocedá’, que fala de promover y esparder la producción artística en llingua asturiana empobinada a un públicu infantil y xuvenil. Esta esposición ye pa tolos públicos, pero sobre manera pa la reciella, y pa facilitar a les families l’usu del asturianu y a implicales nel procesu de normalización de la llingua asturiana”.

La oportunidá de facer llegar les histories n’asturianu

Una emocionada Álvarez aseguró que “ye un día perimportante pa min. Toi mui arguyosa, de verdá, y ye mui emocionante porque ye materializase tolo que ta nel llibru y velo trespasar les páxines, que ye un poco la idea”. Porque ún de los oxetivos del llibru “ye la visibilización de les muyeres, pero sobre manera la visibilización de les asturianes, esi referente más cercanu, el referente de casa”.

Confesó tar “almirada” pola propia esposición y pol programa d’actividaes que complementa la muestra y aseguró que “ye mui importante dar esa visibilidá a les muyeres y nel casu d’esti llibru, que tien versión n’asturianu y castellanu, ye doblemente meritoriu facelo n’asturianu porque da la oportunidá de que toes eses histories puedan tamién llegar a munchísimes persones nesta llingua”. Pela so parte, Rodríguez López, que detalló los eventos que van arrancar el 11 d’avientu con una charra-alderique sobre les ‘Cigarreres. L’alma de Tabacalera’, quixo agradecer a “tola xente que nos prestasteis cosines pa completar esta esposición tan prestosa”.

La esposición ‘Asturianes’, compuesta por paneles coles ilustraciones del llibru asoleyáu por La Fabriquina, editáu na so versión n’asturianu por Araz, empresa editora tamién d’Asturies.com; un escenariu pa facer semeyes coles cigarreres; y vitrines colos oxetos cedíos por protagonistes o ciudadanos, como un stick de ḥoquei, un paquete de Ducados o los llibros de ‘El arte de cocinar’, va poder visitase hasta’l 29 de xineru na sala 3 del Centru de Cultura Antiguu Institutu.

Na semeya, López Moro, Álvarez y Rodríguez López.