Charres, talleres y un conciertu d'Alicia y Mar Álvarez pa complementar la muestra 'Asturianes'

Toles actividaes son de baldre, anque pa les de calter práuticu ye necesario acutar plaza.

La esposición 'Asturianes' a partir de la obra homónima d'Alicia Álvarez, con ilustraciones de María Ortiz, vien acompañada d'un ampliu y interesante programa d'actividaes venceyaes con dalgunes de les muyeres y coleutivos que recueye esti llibru. Una bona iniciativa de la Oficina de Normalización Llingüística de Xixón en collaboración cola Universidá Popular que complementa a la muestra abierta al públicu hasta'l 29 de xineru na sala 3 del Centru de Cultura Antiguu Institutu.

El primer eventu va ser, el 11 d'avientu, una charra-alderique entitulada 'Cigarreres. L'alma de tabacalera' cola presencia d'Alejandro Nafría, Pablo A. Quiroga y ex trayadores de la Fábrica de Tabacos de Cimavilla, protagonistes del documental 'Cigarreres'. Va ser na sala de conferencies del Antiguu Institutu a les 19 hores.

Pal 15 d'avientu ta programáu nel Aula de Cocina del Centru Municipal Integráu d'El Llano, de 10 a 14 hores, el taller 'Nos fogones de María Luisa', a cargu d'Ana Cifuentes, nel que se van trabayar dalgunes de les recetes del llibru presente en toles cases del país, 'El arte de cocinar'. L'actividá ta llendada a 12 places y l'apertura d'inscripción va abrise a les 8.30 hores del martes nesta páxina web.

El 12 de xineru va ponese la charra 'Tertulia Feminista Les Comadres', a les 19 hores nel salón d'actos del Antiguu Institutu. Nél van xuntase l'autora de 'Asturianes', Begoña Piñero y Pilar Sánchez Vicente "pa recuperar y recordar con esa retranca que tienen lo que ye la historia del movimientu feminista en Xixón", apuntó María Xosé Rodríguez López, responsable de la Oficina de Normalización Llingüística, na inauguración de la muestra.

Dos sobre Alcayde

La pintora Julia Alcayde va protagonizar dos actividaes. El 15 de xineru a les 19 hores nel salón d'actos de la Escuela de Comerciu, va tener llugar una charra, 'Creando dende los márxenes: Julia Alcayde y el bodegón', por Carmen Díaz-Faes, que va poner el día 18, de 18 a 20 hores, nel antepar del segundu pisu d'esi mesmu centru'l taller 'Frutes, flores y fanzines: (de)construyendo bodegones con Julia Alcayde' pa un total de 16 persones qu'han d'inscribise tamién dende'l martes.

Alicia y Mar Álvarez, o lo que ye lo mesmo, Pauline en la Playa, van tocar el 23 de xineru a les 19 hores nel patiu del Antiguu Institutu cantares venceyaos al llibru 'Asturianes'. Van sonar asina temes de La Busdonga, Muyeres o Undershakers, amás de composiciones propies del grupu actual de les dos hermanes.

Pa finar, Arantxa Margolles va falar sobre 'Urraca, el misteriu de la bastarda que quixo ser reina d'Asturies' el 25 de xineru a les 19 hores nel Foru de Muyeres d'El Llano que tien llugar nel centru municipal integráu d'esti barriu xixonés.