Alicia Álvarez dedica’l llibru ‘Asturianes’ a muyeres que participaron “na construcción de la nuestra historia”

|
Cubierta 'Asturianes' d'Alicia Álvarez

“Nun ye necesario dir mui lloñe pa buscar referentes femeninos” n’Asturies, apunten dende La Fabriquina, qu’asoleya con ‘Asturianes’ el primer títulu del so catálogu pa un públicu adultu y mozu. Alicia Álvarez, apoyada nes ilustraciones de María Ortiz, allega al llector les vides y conquistes de venti muyeres o coleutivos del país “que contribuyeron colos sos llogros a rozar el camín de la igualdá”.

Aida Lafuente, Margarita Salas, Corín Tellado, les cigarreres, Xosefa Xovellanos, la Busdonga o Rosa Fernández son dalgunes de les asturianes que protagonicen esti proyeutu nuevu de la periodista, escritora y música. Persones que “ensin el so inconformismu y la so valentía nun sedría posible recuperar el papel activu que per sieglos se-yos negó a les muyeres na sociedá”, espliquen.

En total son venti histories de “muyeres y colectivos inspiradores” que nos traen “de forma única a les vides, profesiones, conquistes y momentos determinantes d’estes asturianes que participaron de manera fundamental na construcción de la nuestra historia”. Una escoyeta de personaxes femeninos que, “dende distintes árees y en diferentes momentos históricos, contribuyeron colos sos llogros a rozar el camín de la igualdá”.

N’avientu a la venta

Destinada a un públicu adultu o mozu, esti álbum ilustrau de tapa duro va asoleyase n’avientu n’asturianu y castellanu. David Guardado encárgase de la torna al nuesu idioma de ‘Asturianes’, que na so versión en llingua asturiana edita Araz.net, empresa editora tamién d’Asturies.com.

Contador Estadistiques