Aporta l’Antroxu más diferente, nel que sobreviven delles tradiciones

‘Un Antroxu de palu’ o ‘Esto nun ye l’Antroxu’ son los lemes emplegaos esti añu por Mieres –qu’esti añu sí lu celebra en fecha– y Xixón, de manera respeutiva, pal Antroxu modernu que se festexa esto díes. A falta de les actividaes habituales na cai por mor de la pandemia de COVID-19, sobreviven delles tradiciones, como los postres y productos típicos d’esta época del añu.

Los frixuelos, casadielles o ‘teresites’ nun van faltar nos llares asturianos estes xornaes, nin platos con productos procedentes del gochu, como’l pote, la sopa de fégadu o'l picadiellu. Ye la manera de celebrar esti añu l'Antroxu, de puertes pa dientro, porque la situación sanitaria obliga a nun interactuar colos vecinos.

Esta festividá entamaba nel pasáu col solsticiu d’iviernu, con mazcaraes per tol país, y agora, tres la recuperación acontecida cola fin del Franquismu, resúmese a les xornaes previes al Miércoles de Ceniza, primer día de la Cuaresma. Una vuelta, sicasí, alloñada de la tradición, imitando a los carnavales más mediáticos como’l de Rio de Janeiro, Tenerife, Las Palmas o Cádiz.

Los ayuntamientos programen nesta ocasión actividaes en llinia. D’esta forma, nun habrá mazcaritos nes cais d’una manera tan mayoritaria como años pasaos, anque nun faltará dalgún que s’antroxe nestos díes que tienen como feches claves el Domingu’l Gordu, el Llunes d’Antroxu y el Martes d’Antroxu, día nel que s’entierra la sardina.

Como novedá, llugares que retrasaben, pol puxu del Antroxu de Xixón y Avilés, les celebraciones pa favorecer a la hostelería, desendolcándola en plena Cuaresma, esti añu entamen l’Antroxu en fecha. Ye’l casu de Mieres, mentes qu'Uviéu, únicu llugar del país que refuga’l términu asturianu y festexa’l ‘Carnaval’, allárgalu hasta'l domingu 21.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente, entituláu 'L'Antroxu'. Los más mozos tamién pueden averase a esta celebración col reportaxe de la nuesa estaya infantil 'A la Gueta los Suaños'.