Andecha va restituyir les plaques n'alcordanza de Belarmino Tomás nel actu añal d'homenaxe

Sufrieron un actu vandálicu depués de 20 años instalaes. Enantes, la formación nacionalista va recordar a los 24 mártires de Carbayín.

Andecha Astur, en contraposición col 'Día de la Hispanidad', tona a escoyer el 12 d'ochobre como xornada d'homenaxe a la Revolución d'Ochobre del 34. Asina, entama un doble actu, nel cementeriu de Carbayín y nel de Pando.

La primer convocatoria ye a les 12.30 hores nesti llugar de Siero onde tán enterraos los 24 homes de la cuenca'l Nalón qu'asesinó la Guardia Civil en Curuxona la nueche 24 d'ochobre del 1934, una vegada finada la Revolución. Una hora más tarde la cita var ser en La Felguera, onde s'afaya la tumba d'ún de los principales líderes de los fechos acontencíos agora va 88 años.

L'actu va aprovechase pa reponer les plaques n'alcordanza de Tomás instalaes nel llugar por Andecha Astur va 20 años y que recién sufrieron un actu vandálicu.

Na imaxe, una de les plaques de recuerdu a Tomás, estrozada. Semeya propiedá d'Andecha Astur.