Cinco empreses agroalimentaries qu’usen l’asturianu van tener un espaciu n’AGROPEC

Iniciativa pol Asturianu va poner per primer vez un puestu na Feria del Campu y les Industries Agrícoles, Ganaderes, Forestales y Pesqueres (AGROPEC) que se celebra esta fin de selmana nel xixonés Recintu Ferial Luis Adaro. Nél van tener espaciu cinco empreses agroalimentaries qu’usen l’asturianu na so actividá comercial.

Llueu de la perbona esperiencia de la presencia d’esta organización nes cinco ediciones últimes de la Feria Internacional de Muestres d’Asturies (FIDMA), dando agospiu a 13 firmes esti añu, agora decídese a tar presente na otra gran feria clásica de les que se celebren en Xixón. Trátase d’AGROPEC, que vive dende mañana y hasta'l domingu la so trentena sesta edición n’horariu de 11 a 20 hores y con entrada a un preciu de 2 euros.

El puestu d’Iniciativa pol Asturianu va asitiase nel pabellón 3-4 del Palaciu de Congresos y nél van tar presentes Astursabor, Bodegas Obanca (Ḷḷumés), Cerveza Caleya, Llagar Castañón (Val de Boides) y Quesería Ca Sanchu. Toes son empreses qu’empleguen l’asturianu na so actividá comercial y etiquetáu de productos.

L’oxetivu ye amosar el valor añadíu del usu del idioma sector alimenticiu, “orixinando actividá económica, creando puestos de trabayu y xenerando riqueza”.

Na semeya, puestu d'Iniciativa pol Asturianu nesta edición de la FIDMA.