Ureta va ser el tercer escritor en disfrutar de la beca ‘Asturies’ na Residencia Literaria 1863

Milio Ureta va disfrutar d’una estancia d’un mes na Residencia Literaria 1863 d’A Coruña pa desendolcar un proyeutu creativu. Magar ser ésta la edición más concurrida, el xuráu decidióse por unanimidá pola so propuesta, polo que va poder vivir la esperiencia que previamente merecieron Miguel Rodríguez Monteavaro y Pablo X. Suárez.

Rafael R. Valdés, Berta Piñán y el propiu Suárez encargáronse de valorar les iniciativaes presentaes a la III Beca ‘Asturies’ de Lliteratura en Residencia, rescamplando’l númberu y la diversidá de les mesmes, amás de les distintes miraes tocante a xéneros y temátiques. Finalmente ganó la d’Ureta por ser “la propuesta lliteraria más ambiciosa; un proyectu sólidu qu'entemez estilos que xueguen y raspien lo narrativo, lo poético y lo dramático, y que cunta con un trabayu previu de documentación”.

Amás consideraron que ye una propuesta d'autoficción que se presenta “nel momentu d'ellaboración oportunu”. En concreto, detállase que ye un proyectu narrativu ambiciosu, chiscáu d'elementos dramáticos y poéticos que combina memoria, identidá y conciencia de clas al traviés d'un personaxe femenín.

D’esta forma’l ribeseyanu va disfrutar n'avientu una estancia d’un mes na residencia dirixida por Yolanda Castaño, recién Premio Nacional de Poesía pola so obra en gallegu ‘Materia’, na que va poder desendolcar el so proyeutu nun apartamentu “construyíu en 1863, añu que marca’l Rexurdimento de la lliteratura gallega, remocicáu dafechu pa facilitar la máxima concentración y inspiración nel trabayu lliterariu”, apunten les bases de la beca, y vivir la vida cultural d’A Coruña. Va recibir 800 euros, amás de dieta de desplazamientu, pa gastos de mantención.

Graduáu n'Humanidaes y con formación n'interpretación actoral, dramaturxa y escritura creativa, Ureta ye autor de rellatos curtios y traducciones lliteraries, actividaes que compaxina col trabayu nel sector turísticu. Tien espublizaes obres como ‘Poemes del amor simétricu’ (2019, Trabe) o 'Pexe les manes' (2022, Trabe), col que ganó’l XXX Premiu Teodoro Cuesta de Poesía, correspondiente al añu 2021.