El Partido Popular astúvose.

La proposición non de llei pa que la Xunta Xeneral sofitara la Querella Arxentina contra'l franquismu por xenocidiu, presentada de forma conxunta por Podemos y Izquierda Xunida, salió alantre na votación celebrada na sesión plenaria del vienres gracies a los votos de la FSA-PSOE y de Ciudadanos. El PP astúvose y Foro foi la única formación que votó en contra.

La música asturiana, de llutu.

María Sánchez Blanco, la Pastorina del Cares, dexónos esta fin de selmana por mor d'una enfermedá llarga que l'apartara de los escenarios nos últimos tiempos. Detrás dexa una llarga carrera d'ésitos dientro'l mundu de la tonada y un bon recuerdu ente los artistes del xéneru.

Esti domingu 20, tendremos nel Teatru Xovellanos de Xixón la representación de la obra "El xuegu de Yalta", a cargu del grupu Telón de Fondu.

Los traxes d'aldeana y porruanu llaniscos van ser próximamente declaraos Bienes d'Interés Cultural (BIC). El Conseyu del Patrimoniu Cultural yá entamó los espedientes pa protexer el modelu más popular de la nuesa indumentaria tradicional.