El fin de selmana dexó importantes victories pa los deportistes asturianos. Fernando Alonso, el ciclista avilesín Rubén Ruíz y l’Uviéu firmen los triunfos; mentantu que’l Sporting perdió’l domingu énte’l Getafe.

El pilotu asturianu de Ferrari Fernando Alonso colocóse llíder con 231 puntos del Mundial del Gran Premiu de Corea. Tamién destacó l’abandonu de los sos rivales Mark Webber y Sebastián Vettel, del equipu Red Bull.

El secretariu xeneral d'UXT, Cándido Méndez, anunció qu'a mediaos d'avientu establecerá una campaña de movilizaciones simultánea de toles organizaciones sindicales nel conxuntu d'Europa.

Unidá Nacionalista Asturiana calificó de “primer pasu” la sentencia del TSXE sobre’l canon dixital. Sicasí, los nacionalistes opinen que’l procesu tien de dir “más allá”, incluyendo a los usuarios particulares.

El coordinador d’UNA, Miguel Ánxel Díez, tresmitió la satisfacción “moderada” d’UNA sobre la sentencia del del Tribunal de Xusticia de la Xunión Europea, que declara illegal el canon sobre copia privada pa empreses y profesionales.

El 51% de los llectores d’Asturies.com que participaron nel caberu Conceyu Abiertu piesen que, tres la intervención de Colunga nel DOP, la izquierda asturianista pue airear la política asturiana.

“Tuvo una intervención decente de Colunga, pero podía ser meyor”, foi la segunda respuesta más votada, con un 22%, mientres qu’a un 18% de los llectores que participaron na encuesta nun-yos prestó nenguna de les intervenciones.

La manifestación convocada pol Ensame República Asturiana contra los Premios Príncipe suma nuevos apoyos. Les organizaciones independentistes Fai!, Darréu y Sofitu y el sindicatu CSI van tar presentes.

L’Ensame República Asturiana (ERA) convocó, como nos últimos años, una manifestación contra los Premios Príncipe. La protesta va arrancar el prósimu sábadu 23 d’ochobre, a les 13 hores, de la Estación del norte d’Uviéu.

Xente Gai Astur (XEGA) va sumase esti sábadu 23 d’ochobre a una iniciativa internacional col oxetivu de qu’en 2013 la transexualidá sala del catálogu d'enfermedaes mentales. Nesi intre, va celebrase una concentración en Xixón.

“En 1990 la homosexualidá dexó de ser considerada enfermedá mental, y el  mesmu camín espera percorrer la transexualidá en 2013”, señalen dende XEGA sobre una opción sexual qu’entá ta dientro del  catálogu d'enfermedaes de la Organización Mundial de la Salú.

El diputáu del Bloque por Asturies y voceru del Grupu Parllamentariu Mestu, Roberto Colunga, presentó una Proposición Non de Llei na Xunta Xeneral en defensa del incrementu de la reducción, recoyida y reciclaxe de residuos.

Asturies xenera cada añu más de 500.000 tonelaes de residuos n’hogares, casi 500 kilos por habitante y añu. D’ello namás que se recicla el 9’9% y, según el Bloque por Asturies, “deberiemos tar nel 50%”

La Federación Asturiana Memoria y República (FAMYR), presentó la programación del Republicastur 2010. Dientro de los actos va ver una charra y alderique al rodiu la plurinacionalidá nel Estáu español.

Otru añu más celébrase’l Republicastur, eventu organizáu pola asociación asturiana de memoria histórica FAMYR. La edición d’esti añu va dedicada a Cristino García y Comandante Robert, guerrilleros antifranquistes asturianos a los que l’asociación quier que-yos dean el títulu fíu predilectu d’Asturies y la medalla d’oru d’Asturies.

El Conceyu d’El Franco, en collaboración cola Fundación Parque Históricu de Navia, organiza’l II Cursu de Llingua y Cultura del Navia-Eo. Va celebrase ente payares y avientu n’A Caridá.

Esti cursu, continuación de la primer edición fecha nel añu 2008, axunta charres y ponencies sobre estremaes materies rellacionaes cola fastera eonaviega. Gramática de gallego-asturianu, lliteratura, sociollingüístia, tradición oral musical, mitoloxía o interpretación toponímica; son dalgunos de los temes presentes.