El Franco acueye un cursu de llingua y cultura de Navia-Eo

El Conceyu d’El Franco, en collaboración cola Fundación Parque Históricu de Navia, organiza’l II Cursu de Llingua y Cultura del Navia-Eo. Va celebrase ente payares y avientu n’A Caridá.

Esti cursu, continuación de la primer edición fecha nel añu 2008, axunta charres y ponencies sobre estremaes materies rellacionaes cola fastera eonaviega. Gramática de gallego-asturianu, lliteratura, sociollingüístia, tradición oral musical, mitoloxía o interpretación toponímica; son dalgunos de los temes presentes.

Ente les persones que van impartir los cursos destaquen Ignacio Vares, Xosé Miguel Suárez Fernández “Tapia”, Xosé Antón Fernández “Ambás”, Benxamín Méndez, Refael Cascudo Noceda, Marta Trevín ou Iván Iglesias Fernández “Cazarón”.

Inscripciones
Esti cursu va impartise tolos martes y xueves dende’l 2 de payares hasta’l 16 d’avientu na Sala Cultural “El Pajar” del Complexu Cultural “As Quintas”, n’A Caridá (El Franco). La inscripción hai que la facer enantes del 29 d’ochobre.