XEGA movilízase pola despatoloxización de la transexualidá

Xente Gai Astur (XEGA) va sumase esti sábadu 23 d’ochobre a una iniciativa internacional col oxetivu de qu’en 2013 la transexualidá sala del catálogu d'enfermedaes mentales. Nesi intre, va celebrase una concentración en Xixón.

“En 1990 la homosexualidá dexó de ser considerada enfermedá mental, y el  mesmu camín espera percorrer la transexualidá en 2013”, señalen dende XEGA sobre una opción sexual qu’entá ta dientro del  catálogu d'enfermedaes de la Organización Mundial de la Salú.

Pa reclamar la despatoloxización de la transexualidá va celebrase’l prósimu 23 d’ochobre en 57 estaos un xornada internacional de reivindicación. N'Asturies, XEGA convocó una concentración na Plaza del Conceyu de Xixón, sábadu 23, a les 19 hores.

Reivindicaciones nel Estáu
Xunto a la reivindicación internacional común, XEGA tamién fae reclamaciones nel marcu del Estáu español. El colectivu gai va pidir que s’implante el nuevu protocolu non patoloxizante d’atención sanitaria a les persones transexuales, nel que tán trabayando un  grupu formáu a iniciativa de la FELGTB, con aval del Ministeriu de Sanidá.