L'Asturorum Regnum

Tres la derrota de los godos polos musulmanes na batalla'l Guadalete nel 711, éstos invaden y conquisten la Península Ibérica, ensin atopar gran oposición d'una sociedá como la visigoda con estructures decadentes, tarazada en clases y yá somorguiada nun procesu de feudalización. Ensín embargo, esta oposición sí se dá ente musulmanes y ástures, oposición que yá s'espeyare contra los visigodos y contra los romanos, y como espresaben los profesores Barbero y Vigil "respondía a una profunda oposición entre sus respectivas organizaciones sociales". Magüer la influyencia de Roma nel territoriu de l'Asturia transmontana, caltuviéronse llargo tiempu formes sociales xentilicies, ensin grandes latifundios nin ruptures sociales. Amás, la desarticulación del sistema alministrativu tardorromanu, aguiyáu poles invasiones xermániques, afaló l'autonomía de los ástures, y otros pueblos norteños, viniendo ser ésta una vraera independencia na práctica. Tamién les sos formes sociales tradicionales, de calter xentiliciu, viéronse fortalecíes. Nesta sociedá, con evidentes güelgues d'arcaismu, la población yera mayoritariamente llibre y ensín campesinos reducíos a la servidume, y entá nun algamare una estructura política con carácter estatal. Nesti contestu tien llugar la batalla de Cuadonga nel 718, fechu envolubráu na grandilo cuencia mitificadora, y la escoyeta de Pelayo -probable xefe local astur, según les últimes investigaciones- como princeps nun conceyu de xefes tribales -duces- na redolada del monte Auseva. Esti fechu bélicu marca l'aniciu de la Monarquía asturiana cola instalación de la corte en Cangues d'Onís. La consolidación del reinu vién marcada pol treslláu de la corte a Santianes de Pravia -probablemente l'antiga Flavionavia, a la vera'l Nalón-, y depués a Uviéu, la definitiva capital. Estremaes coyuntures favoratibles permitieron la espansión territorial del Reinu a l'actual Galicia, y tamién al Este y al Sur, asina como la ellaboración de polítiques tendentes a la so consolidación. La Monarquía asturiana preséntasenos como un procesu d'evolución política que dende una xefatura militar algama a cristalizar nun reinu de calter feudal. A lo llargo de los cuasi dos sieglos que dura la Monarquía asturiana, los estremaos soberanos desendolquen estratexes tendentes a la consolidación política del so Estáu independiente. Asina tenemos creaciones artístiques como l'Arte Prerrománicu Asturianu, braeru arte aúlicu, enmarcáu nun procesu de fundaciones rexies pa da-y prestixu y presencia al poder real asturiano; o el descubrimientu en tiempos d'Alfonso II (791-842) del hipotéticu sepulcru del Apostol Santiago en Compostela, fechu de fonda trescendencia política y cultural que s'esplica poles necesidaes polítiques del Reinu asturianu nesi momentu hestóricu; o la polémica que contra l'obispu toledanu Elipando y les sos tesis adopcionistes caltién Beato de Lliébana, defendiendo la ortodosia y la independencia de la Ilesia asturiana frente a la Ilesia mozárabe hispánica.

Al empar, vei afondándose'l procesu de feudalización de la sociedá del Reinu asturianu y consolidándose una clase dirixente señorial y eclesiástica que van ellaborando l'ideal goticista -nel qu'intervinieron activamente mozárabes emigraos d'Al-Andalus- como xustificación ideolóxica de la so dominación y que s'espeya de forma contradictoria nes cróniques escrites en tiempos del rei Alfonso III (866-911), últimu soberanu que tién la so sede en tierres asturianes. A la muerte del rei Magno, el so fíu, Ordoño II, fai real el treslláu de la Corte a Lleón, esplicable pola espansión y consolidación teritorial y la circunstancia de qu´otra base social y otru estadíu d'evolución ye la basa de la estructura política de la Monarquía dende l'espardimientu del ideal y programa goticista. De magar entós, Asturies queda atrás, alloñada y ayena a les fontes de poder y decisión qu´anteriormente foron-y propies. La sociedá asturiana sigue evolucionando dientru del xeneral procesu del feudalismu occidental, anque más bien impermeable a aspeutos superestructurales goticistes