Roma Los Sieglos Escuros

A lo cabero´l sieglu I B.P., depués de dos sieglos de presencia na Península Ibérica, Roma entama una campaña militar en toa regla contra los ástures y los cántabros, les dos naciones qu´entá calteníen la so independencia. Los ástures, al dicir de los hestoriadores romanos (Tito Livio, Floro, Dión Casio, Orosio), baxaren de les sos nevaes montañes con un gran exércitu y una estratexa mui atalantada, estremándose en tres grupos p´atacar los tres campamentos romanos del Astura (Elsa), siendo traicionaos polos brigaecinos, que-yos estropearen los planes faciéndolos sofrir una derrota a costa de grandes pérdes romanes. Depués volveríen a enfrentase na civitas de Lancia, siendo otra vegada derrotaos depués d´una descomanada resistencia.

El preciu de la paz costará-yos léscavar esforciadamente la tierra pa pagar los tributos a Roma, cuando non les leves masives de la so mocedá como tropes ausiliares del exércitu imperial. Embaxu´l Imperium produzse una esplotación xeneralizada de los recursos humanos y naturales (sobre tou na minería) y una aculturación que , ensin desaniciar la so identidá d´ástures, sí va camudala sustancialmente (llingua, relixón, economía).

Nel sieglu V, coles invasiones xermániques, hebo un asitiamientu temporal n´Asturies de los Vándalos Asdingos, que depués pasarán pa la Bética. A lo llargo´l sieglu VI alléguense grupos de bretones afuxíos de Gran Bretaña, fundando l´Obispáu de Bretonia, del que fontes altumedievales aseguren ye herederu l´Obispáu d´Uviéu. Tres de les invasiones del sieglu V, les lluches pola independencia de los ástures y los ruccones (luggones) intensifíquense hasta que´l rei godu Wamba (672-681) acaba adondándolos ya integrándolos nuna nueva provincia.