Orfrebreria / Oxetos d' Adornu

Nun País tan ricu n'oru como foi Asturies na Edá del Fierru tuvo d'haber un bon gremiu d'aureses especialistes na so tresformación y ellaboración, lo que pue vese nos restos que llegaren hasta nós. Les técniques qu'amuesen estes pieces van dende'l estampilláu en fueya d'oru, la fundición a la cera perdío y les más evolucionaes de la filigrana.

Esta orfebrería ástur tien tres tipos básicos de pieces: Les plaques estampillaes, que diríen nun un soporte d'otru material (cueru, por exemplu) y que son interpretaes como diademes o como plaques de cintura; d'ésti tipu hai delles sobresalientes, como la de Cangues d'Onís, la de A Veiga y los retayos de la de Moñes (Piloña). Los torques son otru d'estos xéneros de pieces: collares enterizos, tiesos, remataos en doble escocia, distinción de la nobleza y los grandes guerreros, ente los que destaquen los nomaos de Cangues d'Onís, el de Llangréu, el de Valentín de Cuaña y el de Tinéu, que se fundió cuando la Guerra Civil y que conocemos por una semeya. A les plaques y los torques había qu'amestar toa una riestra de producciones que representen un tipu por sigo mesmes: broches, pulseres, colgantes, amuletos, discos, arracaes... que nos falen de la esistencia d'unes fainos élites principesques que van más p'allá de la organización xentilicia y que, de momentu, tovía nun somos quien a definir.

En bronce tamién se trabayaben pieces funcionales y d'ornatu personal, especialmente les fíbules o prendedores pa los fatos de vistir, y de les que tenemos bayura de tipos: de turrexina, de caballín, simétriques, anulares, etc.; amás d'otres como enganches, y mesmo torques.