“Escribiríamos a la editorial pa que rectificase si hubiera una errata sobre l’asturianu”, diz Espina

La Conseyería d’Educación nun tien constancia d’errores en llibros de testu nel tratamientu de la realidá llingüística d’Asturies magar que tolos entamos de cursu apaecen casos espuestos por padres o docentes. Lydia Espina nun fixo referencia al idioma o la especialidá docente na so comparecencia, na qu'avanzó que nel 2024 van abrir les primeros centros de 0 a 3 años de titularidá autonómica.

Foi Podemos, al traviés de la diputada Cova Tomé, la que treslladó esta problemática a la conseyera nel turnu d’entrugues de la Comisión d’Educación na Xunta Xeneral depués de la intervención de la responsable pa presentar el so programa de gobiernu pa esta llexislatura. La valdesana señaló que’l so grupu recibiera quexes de docentes sobre’l tratamientu que se-y da a la llingua asturiana y al gallego-asturiano en llibros de testu, con “errores” y “comentarios obsoletos nos que, en munchos d’ellos, s’asigna al asturianu la consideración de dialeutu o inclusive de llingua muerta”, y preguntó “si piensen tomar dalgún tipu de midida pa que nos cursos vinientes nun se repitan estos mesmos errores sobre l’asturianu”.

Espina señaló que “nun conozo esautamente los casos que me dicen”, cola dulda de si se refería a llibros de testu de la materia concreta de Llingua Asturiana y Lliteratura. Llueu d’especificar que correspuenden a los d’otres asignatures o árees, la conseyera esplicó que “nosotros nun revisamos los llibros de testu, como bien sabe espublícenlos les editoriales y entendemos que tán fechos con tol rigor. Evidentemente si hai dalguna dificultá añadida, que nun tenemos constancia, podríamos ensin llugar a duldes escribir a la editorial pa que rectificase si hubiera una errata”.

Nesi sen, añadió “que si hubiera una errata o un datu que sía incorreutu, que nun tuviese bien, gustaríanos que nos informasen d’ello”, especificando que “nosotros nun tenemos constancia y nun nos llegó”. Por último, esplicó que “los docentes, dientro de cada centru escolar, escueyen los sos llibros de testu, ye autonomía de xestión”, y solicitó que “si hai dalguna cosa que tien una incorreición manifiesta nos la faigan llegar pa que nosotros podamos ponenos en contautu cola editorial”.

Comedor en xunu y setiembre nel 2025

Na so comparecencia Espina nun fixo referencia nenguna a les llingües propies. Tampoco sobre la situación na que ta la creación de la especialidá docente de Llingua Asturiana y Gallego-asturiano, paralizada pol Ministeriu d’Educación, o sobre midíes previstes al respeuto d’una vieya demanada del sector docente.

Les principales anuncies de la conseyera foron la inauguración nel 2024 les primeras escueles de 0 a 3 años de titularidá autonómica en conceyos que nun tengan o que cuenten con llista d’espera, añu nel que tamién esti ciclu d’Infantil va pasar a ser de baldre dafechu; la estensión a partir del 2025 del servicio de comedores a setiembre y xunu; la negociación d’un alcuerdu nuevu d’interinos; la ellaboración de la Llei d’Educación; y l’impulsu d’un plan de revisión estructural de determinaos centros d’enseñu.

Na semeya, Espina intervién na Comisión d'Educación con David Artime, direutor xeneral d'Inclusión Educativa y Ordenación, y Julio Vallaure, d'Infraestructures y Teunoloxíes Educatives, a la so derecha; y la secretaria téunica de la consejería, Begoña Fernández, el direutor xeneral de Personal Docente, César González, y la de Centros, Rede 0-3 y Enseñances Profesionales, Eva Ledo, a la so izquierda.