Tomé va intepelar a Espina sobre'l tratamientu del asturianu nos llibros de testu

Caltiénense los errores y comentarios inexautos en munchos de los materiales que s'empleguen nes escueles del país, polo que los alumnos "siguen recibiendo una visión distorsionada".

Continúen les comparecencies en comisión de los diferentes conseyeros pa dar a conocer el so programa de gobiernu nesta llexislatura. Mañana va ser el turnu de la d'Educación, Lydia Espina, dende les 9.30 hores na Sala Constitución de la Xunta Xeneral.

El turnu d'entrugues de los diferentes grupos parllamentarios va ser aprovecháu por Cova Tomé, diputada de Podemos, pa interesase sobre qué va facer el Gobiernu al respeuto del tratamientu del asturianu y del gallego-asturianos que se da nos llibros de testos, qu'en munches ocasiones caltienen errores y comentarios inexautos, como vienen denunciando munchos padres y maestros esti entamu del cursu. "¿Piensen tomar dalgún tipu de midida pa que nos cursos escolares vinientes nun se vuelvan a producir esti tipu de circunstancies?" ye la entruga concreta.

"Los llibros de testu que s'enseñen nos colexos y institutos de la comunidá autónoma nun recueyen de manera acertada la realidá llingüística d'Asturies, con comentarios inexautos, obsoletos o, inclusive, fuera de llugar. En munchos d'ellos trátase de manera mui secundaria esti aspeutu relevante de la realidá social del país, asignando al asturianu la consideración de dialeutu o, inclusive, de llingua muerta", apunten dende Podemos.

La formación morada recuerda que "yá nel añu 2005 el filólogo Ramón d'Andrés, naquel momentu direutor de la Oficina de Política Llingüística, alvertía d'ello", lo que llevó a la ellaboración d'un informe y elaboraba un informe entituláu ‘La lengua asturiana en los libros de texto. Tratamiento y ajuste al marco curricular’ "que nunca se llegaría a distribuyir per parte del Gobiernu asturianu".

"Cuasi venti años depués d'aquel informe, y coles competencias n'Educación asumíes pola nuesa comunidá dende va décades, la situación nun ameyoró y l'alumnáu asturianu sigue recibiendo, al traviés de los llibros de testu, una visión distorsionada de la nuesa realidá llingüística", denuncia.

Na imaxe, Tomé esta mañana na Comisión de Salú.