Tomé va entrugar pol Plan de Normalización Llingüística na comparecencia de Llamedo

El llunes va celebrase la Comisión de Presidencia, Retu Demográficu, Igualdá y Turismu de la Xunta Xeneral pa informar del programa de gobiernu de la conseyería.

La diputada de Podemos, Cova Tomé, va entrugar esti llunes na sesión prevista a les 9.30 pa la comparecencia de Gimena Llamedo, como responsable de la conseyería, pol Plan de Normalización Llingüística y pola creación d'una Axencia Asturiana d'Industries Culturales. Nel primer casu, la formación morada entiende "mui necesario" la ellaboración d'ún, apuntando que la falta d'oficialidá, magar que supón amenorgar los derechos de los falantes d'asturianu y gallego-asturiano, nun impide que se pongan en marcha midíes de promoción "animando al so usu y reforciando'l texíu social, económicu y industrial que surdió al so alredor".

Esti Plan, que ta nel alcuerdu de Gobiernu ente la FSA y Convocatoria por Asturies, debería ser "ambiciosu, efeutivu y tresversal qu'amuese a la ciudadanía asturiana les posibilidaes de desendolcu que suponen les nueses llingües propies, qu'elimine prexuicios sobre elles, que promocione la cultura, la lliteratura, la música y la industria creada en base a les mesmes, y que prestixe y favoreza'l so usu". La pregunta concreta de Tomé va centrase en si dende'l Gobiernu ta previsto poner en marcha aiciones nesi sen o la ellaboración del Plan de Normalización y en qué plazos.

Otra manera, tamién va treslladar a la conseyera si tien en mente crear l'Axencia Asturiana d'Industries Culturales qu'incluyía nel so programa eleutoral la FSA y que nun apaez nel organigrama nuevu del Executivu, y, si nun fora'l casu, si van poner en marcha dalgún tipu de plan o aiciones que favorezan el desendolcu profesional y económicu del sector, asina como qué conseyería s'encargaría d'esti asuntu. Podemos venía defendiendo tamién un organismu d'esti tipu que sirviera d'apoyu pa les cerca de 2.500 empreses que, según datos del Gobiernu del 2017, trabayen nel mundu de la cultura, xenerando 11.600 contratos estables.

Na semeya, Tomé.