A Caridá acueye la segunda fase del cursu de 'Capacitación en Eonaviego' de la UABRA

L'actividá de l'Academia de la Llingua Asturiana (ALLA) n'El Franco compleméntase con trés eventos abiertos a tola ciudadanía.

La Universidá Asturiana de Branu (UABRA), na que collabora la Universidá d'Uviéu, tamién se vive nel occidente del país, onde ta poniéndose dende ayeri y hasta'l día 11 la segunda fase del cursu de 'Capacitación Docente en Eonaviego o Gallego-asturiano', que se va completar con una tercera na seronda, nesti casu en llinia. Aurora Bermúdez, Ágata García Castro, Ruth González Rodríguez, Vanesa Pérez Villamarzo, Isabel Jardón, Ricardo Saavedra y Nancy Vijande son los maestros encargaos de poner les clases.

Na primer xornada Cecilia Pérez Sánchez, alcaldesa d’El Franco, y Carmen Muñiz, representante de la Secretaría Llingüística del Navia-Eo de l'ALLA, dieron el saludu d'empiezu del cursu. Per delantre, diez díes y 60 hores llectives pa la formación de futuros profesores de gallego-asturiano nos centros educativos.

Mañana va tener llugar la primer de les trés actividaes complementaries a la UABRA n'A Caridá. Trátase d'un 'Encontro cua colección, de lliteratura eonaviega, 'Bidureira'', a les 18 hores nel Complexo Cultural As Quintas, cola participación de Carmen Siñeriz cola so obra 'Pigureira de palabras esqueicidas', Sergio Buelga con 'Ondina Llago' y el propiu Saavedra con 'El xogo sin fin', títulos de poesía, teatru y narrativa qu'abren el camín d’una coleición fecha pa recoyer la creación lliteraria contemporánea na llingua del occidente.

El miércoles 9, a la mesma hora y nel mesmu sitiu, la normalizadora llingüística Ángela Ferreira va falar de les 'Funcióis da Oficina Cultural y Llingüística da Fundación Parque Histórico del Navia', y el xueves 10, a les 10.30 hores na Biblioteca Municipal As Quintas, l'alumnáu del cursu va poner la función 'Xunta de mitos', "el mundo máxico d’Asturias núa historia cuntada con marionetas". Les trés actividaes son d'accesu llibre.