La curtia victoria de Feijóo'l 23-X dexa la gobernabilidá nel aire

El PP algamó 136 escaños y VOX 33, lloñe de los 176 que dan la mayoría absoluta. Pedro Sánchez tien un llabor difícil pa zarrar alcuerdos que-y permitan siguir como presidente.

Alberto Núñez Feijóo ganó les eleiciones del 23-X pero podría nun formar gobiernu. El bloque de la derecha quedó a 7 asientos de poder dirixir l'Estáu y, magar que'l gallegu ufrió diálogu y pidió abiertamente al PSOE na celebración de Génova que nun lu bloquiaren, paez difícil que se dea esa circunstancia.

Por contra, el PSOE consiguió 122, lo que supón 2 más que nes anteriores, y Sánchez va tener que llegar a alcuerdos con formaciones que, yá anunciaron, nun-y van poner les coses fáciles si quier na Presidencia. La principal, Junts per Catalunya-Junts, con 7 diputaos claves pa que-y dean los númberos al socialista, pero tamién Esquerra Republicana de Catalunya (ERC), que cuenta igualmente con 7.

Una situación que dificulta la gobernabilidá y dexa nel horizonte una posible repetición d'eleiciones.

47 diputaos más

Con namás una mesa eleutoral por zarrar, el PP llevó 136 escaños con un 33,05 por cientu de los votos, 47 diputaos más qu'en payares del 2019, cuando rexistró un 20,80 por cientu. Pela so parte, el PSOE pasa de 120 a 122 y aumenta los apoyos en más de 3 puntos, al pasar d'un 27,99 a un 31,69 por cientu.

Sigue siendo la tercer fuercia VOX, con un 12,39 por cientu, magar perder 19 diputaos y quedar con 33 (un 15,07 por cientu nel 2019). Sumar, mentes, debuta con 31 y un 12,31 por cientu del total, cuando Xuníes Podemos y les sos confluencies teníen 35.

Van tener tamién representación nel Congresu nesta llexislatura ERC y Junts, con 7 caún; EH Bildu, con 6; EAJ-PNV, con 5; BNG, con 5; Coalición Canaria, con 1; y UPN, con 1. Queden fuera con respeuto a l'anterior, Foro, que tenía un representante y fora en coalición col PP, pero que nun se presentara nesta ocasión, al igual que Ciudadanos, que contaba con 10, y PRC, con 1; la Candidatura d'Unitat Popular-Per la Ruptura (CUP-PR), con 2; y ¡Teruel Existe!, con 1.

La participación nel 23-X foi del 70,40 por cientu, cuatro puntos más que na anterior, cuando quedó nel 66,23. Hebo un 0,81 por cientu de votos en blancu y 1,05 de nulos, porcentaxes práuticamente idénticos que nel 2019.

Mayoría absoluta popular nel Senáu

El PP, col 99,01 del votu escrutáu, cuenta con mayoría absoluta nel Senáu, con 120 representantes, 37 más qu'agora. El PSOE queda con 21 menos, un total de 72.

Los otros partíos con representación son Izquierdas por la Independencia, con 7; EAJ-PNV, con 4; Junts, con 1; Agrupación Socialista Gomera, con 1; Agrupación Herreña Independiente, con 1; Eivissa i Formentera al Senat, con 1; y UPN, con 1. Pierden presencia Aragón Existe y VOX, que teníen 1 caún.

Na imaxe, Ñúñez Feijóo celebra la so victoria xunto con compañeros del partíu na sede de Génova. Semeya del Partido Popular (PP).