“La UABRA d’El Campu ufre tolos elementos de siempre más l’adicional del paisaxe”, rescampla Valdés

El Parque Natural de Redes ye l’entornu onde se va desendolcar la XIII Universidá Asturiana de Branu (UABRA) de l’Academia de la Llingua Asturiana (ALLA), que torna a la presencialidá depués de dos ediciones en llinia y una cancelada. El Campu va permitir al cuasi centenar d’alumnos qu’acude tolos años a los cursos formase y vivir per una o dos selmanes nun ambiente n’asturianu dafechu.

“La UABRA d’El Campu ufre tolos elementos de siempre más l’adicional del paisaxe”, rescampla la so direutora, María Cristina Valdés. L’albergue del Conceyu de Casu va ser el llugar onde se van agospiar alumnos y profesores, mentes que les clases van ponese nel centru d’interpretación del parque y nel centru social.

“Yo creo que facía tiempu qu’había que cambiar de sede”, apunta la profesora universitaria, agradecida, sicasí, pola acoyida que tuvo la UABRA estos años en Cangas del Narcea. “Cambiamos del occidente al centro-oriente, a un sitiu más pequeñu que práuticamente esos díes va convertise na so totalidá en sede de la UABRA”, añade, polo que ye inevitable recordar los cursos de l’ALLA en Santantolín enantes de que se creara’l formatu actual nel 2010.

D’esta forma, “atoparemos otra variante llingüística y otru tipu de llugar, más rural”. Un añu en principio de transición, posible gracies al sofitu del alcalde Miguel Ángel Fernández Iglesias y del Conceyu de Casu, anque nun se descarta que, de salir too bien, El Campu siga siendo sede nos años próximos.

Hai que recordar que nel 2020 estos cursos, que s’entamen en collaboración cola Universidá d’Uviéu, nun se pudieron celebrar pola pandemia de COVID-19. Mentes, nel 2021 y 2022 entamáronse en llinia, sacante’l de gallego-asturiano, que se desendolcó n’A Caridá.

Los cursos

La UABRA va desenvolvese del 31 de xunetu al 11 d’agostu con “una ufierta rica y ambiciosa”. Caltiénense los tradicionales 'Cursu Elemental de Llingua Asturiana’ y el ‘Cursu Avanzáu de Llingua Asturiana’, de dos selmanes de llargor, y los cuatro de ’Afondamientu Cultural y Llingüísticu', dos na primer selmana y otros dos, na segunda, de los que trés son nuevos.

Del 31 de xunetu al 4 d’agostu, va ponese’l de 'Capacitación pa la traducción al asturianu’, “un cursu estratéxicu pa nós’”, que va tener como profesores a la propia Valdés xunto con Daniel Menéndez Menéndez, Xaime Martínez y Aida Celemín. Neses feches tamién va tener llugar el primeru de los que s’estrenen esti añu, el de 'Anovamientu curricular nel marcu de la LOMLOE (Educación Primaria y Secundaria)', “centráu na enseñanza, útil pa conocer tol anovamientu curricular cola nueva llei”, con Xurde Fernández Fernández, Tamara Fernández Antón, Roberto Avello, Xandru Armesto y María Verdeja.

El de '50 años en movimientu: ámbitos y espacios de desendolcu, normalización y vindicación de la llingua asturiana na historia recién', “la historia de la normalización”, que van ufrir Cristóbal Ruitiña, Inaciu Galán, Marcos Rodríguez Álvarez, Pilar Fidalgo, Rafael Rodríguez Valdés, Ramón Lluís Bande, Xicu Ariza y Xune Elipe, va tener llugar del 7 al 11 d’agostu, mesma selmana que’l de 'Recoyida y recuperación de la tradición oral y musical'. Ésti, “mui venceyáu a Casu pola so temática”, va tener como maestros a Xosé Antón Fernández ‘Ambás’, Ramsés Ilesies, José Ignacio Suárez, Mapi Quintana y Llorián García Flórez.

La matrícula pue formalizase hasta’l día 24 y tien un costu de 392 euros pa los cursos llingüísticos y de 216 euros pa los d’una selmana, con pensión completa entrambos casos. El trámite pa la so formulación tamién camudó nesta edición, siendo necesariu facer un primer trámite cola ALLA y un segundu cola Universidá d’Uviéu.

“La UABRA d’El Campu ufre tolos elementos de siempre más l’adicional del paisaxe”, apunta Valdés, que rescampla la combinación d’ufierta académica y d’ociu que presenta esta iniciativa de l’ALLA, con actividaes complementaries como conferencies o actuaciones musicales programaes esos díes nel pueblu y les oportunidaes de contautu cola naturaleza que da Redes. Una esperiencia única que “permite convivir nun ambiente n’asturianu dafechu per una o dos selmanes”, lo que fai que munchos estudiantes repitan.

Los de gallego-asturiano, n’A Caridá

La segunda fase del cursu de 'Capacitación Docente en Eonaviego o Gallego-asturiano' caltiénse, neses mesmes feches, n'A Caridá, al igual que los dos años anteriores. Nesti casu va tener un costu de 160 euros y va completase cola tercera, que va ser en llinia na seronda.

Na semeya, xardín del albergue.