La XIII UABRA va desenvolvese del 31 de xunetu al 11 d'agostu

|
Logu UABRA 2023

La segunda fase del cursu de 'Capacitación Docente n'Eonaviego o Gallego-asturiano' caltiénse, neses mesmes feches, n'A Caridá.

La Universidá Asturiana de Branu (UABRA) de l'Academia de la Llingua Asturiana (ALLA) yá tien fecha: del 31 de xunetu al 11 d'agostu. Esta edición, la decimotercera, recupera la presencialidá depués d'un añu en blanco y dos con clases en llinia, y estrena El Campu como sede pa los cursos en llingua asturiana.

Na capital del conceyu de Casu va ponese'l 'Cursu Elemental de Llingua Asturiana’ y el ‘Cursu Avanzáu de Llingua Asturiana’, de dos selmanes de llargor, y cuatro más de ’Afondamientu Cultural y Llingüísticu'. Nesta ocasión van ser l'habitual de 'Capacitación pa la traducción al asturianu’ y 'Anovamientu curricular nel marcu de la LOMLOE (Educación Primaria y Secundaria)', na primer selmana, y '50 años en movimientu: ámbitos y espacios de desendolcu, normalización y vindicación de la llingua asturiana na historia recién' y 'Recoyida y recuperación de la tradición oral y musical', na segunda.

No que respeuta al gallego-asturiano, el cursu va siguir desenvolviéndose n'A Caridá. Nesta edición toca la segunda fase, que se va completar cola tercer y última de setiembre a payares en llinia.

La matriculación, dende'l 12 de xunu

Los planes propuestos de la UABRA tán agora pendientes de la tramitación ordinaria na Conseyería d’Educación y na Universidá d’Uviéu, que collabora nesta iniciativa de l'ALLA. Ta previsto que’l procesu de matrícula emprime en xunu, el día 12.

Na imaxe, logu nuevu de la UABRA.

AdxuntuTamañu
Image icon Cartelu XIII UABRA148.32 KB
Contador Estadistiques