Bimenes celebra un añu más la declaración d'oficialidá nel conceyu

Entama una amplia programación institucional y folixera pola XXVII Fiesta de la Oficialidá de la Llingua Asturiana, a la qu'antecede un 'Bimenes en Danza'.

26 años depués de la declaración d'oficialidá del conceyu, un 5 de xunetu del 1997, Bimenes conmemora esta fecha un añu más con una gran celebración. Ésta va desendolcase mañana a partir del meudía na plaza de la Casa Conceyu, en Martimporra, cuando van intervenir el primer edil Aitor García Corte y Helena Barril, alcaldesa de Miranda de l Douro, territoriu portugués hermanáu con Bimenes onde’l mirandés, llingua del tueru asturlleonés, tien reconocimientu institucional. La llectura del pregón va correr a cargu de la escritora Blanca Fernández, primer yerbata en tener esti honor dende'l 2006, cuando lo fixera Xulio Vixil.

Nel actu institucional va tar presente un añu más Adrián Barbón. El presidente en funciones va tar acompañáu pola conseyera d'Educación, Lydia Espina, y del direutor xeneral de Política Llingüística, Antón García.

La tradicional Danza pola Oficialidá va desendolvese a les 13 hores, pa siguir con un pasucais del Ensame de Música Tradicional Los Yerbatos y de los Pauliteiros de Miranda de l Douro, que van actuar nel prau del Palaciu del Marqués de Casa Estrada a les 13.30 hores. Nesti espaciu tan guapu del conceyu, onde va haber serviciu de bar, va tener llugar la xira popular a les 14 hores y el restu d'actividaes de la xornada.

A les 17 hores va ponese un taller de deportes como tiru con arcu, llucha’l palu o barru, a cargu del Club Arqueros de Teberga, y a les 18 hores una muestra de baltu. La cena del prau ta anuniciada a les 21.30 hores pa garrar fuercia pa los conciertos d'Algaire (22.30 hores) y La Tarrancha (00 hores), y la sesión de música hasta les 5 hores de la mano de Pepiox DJ.

Tiempu pal baille tradicional

Anque la Fiesta de la Oficialidá de la Llingua Asturiana celébrase mañana, esta nueche yá hai actividá festiva. A les 21.30 hores entámase un 'Bimenes en Danza' nel prau del Palaciu del Marqués de Casa Estrada col Grupu Folklóricu Los Yerbatos y La Bandina d’Oscarín, y finar con Llamedo Eventos DJ hasta les 3 hores.

Enantes, a les 18.30 hores, Víctor Suárez, d’Iniciativa pol Asturianu, pon la charra ‘Política llingüística y normalización. Derechos llingüísticos de normalización pa persones asturfalantes’, última de les actividaes diaries culturales que tienen llugar na Casa Cultura de Santuyano encuadrada en la Selmana Cultural pola Oficialidá del Asturianu, que programó una obra de títeres, una presentación y charres estes xornaes.

Na semeya, la pregonera Fernández.