La Selmana Cultural pola Oficialidá del Asturianu programa actividaes diaries en Bimenes

El sábadu Bimenes celebra la XXVII Fiesta de la Oficialidá de la Llingua Asturiana, que va contar cola escritora yerbata Blanca Fernández como pregonera, pero tolos díes previos el Conceyu programa actividaes culturales. Títeres, charres y presentaciones conformen la Selmana Cultural pola Oficialidá del Asturianu qu’arranca esti llunes.

El 5 de xunetu del 1997 l’Ayuntamientu de Bimenes declaraba la oficialidá del asturianu en Bimenes. Dende entós, tolos años conmemora esta fecha’l primer sábadu de xunetu, una celebración con parte institucional y otra de xuntanza vecinal y folixa que’l Conceyu vien completando los díes previos col entamu d’actividaes encuadraes na Selmana Cultural pola Oficialidá del Asturianu.

Dende esta tarde y hasta’l xueves la Casa Cultura de Santuyano va acoyer una programación variada y pa tolos públicos. Asina, güei, a les 19.30 hores, va ponese l’espectáculu de títeres ‘Azul y la revolución de colores’ de Mar Rojo Teatro.

Mañana, a les 20 hores, Inaciu Galán va dar la conferencia ‘¿Qué ye eso de la toponimia? Asina se recuperaron los nomes de Bimenes’ y el miércoles, a les 19.30 hores, Fernández va celebrar un alcuentru con llectores pa falar de la so última obra premiada, ‘El cartafueyu d’alquimia’, XV Premiu María Josefa Canellada de lliteratura infantil y xuvenil, y de la lliteratura de xéneru n'asturianu. Verbéu, asociación de traductores profesionales n’asturianu que tien sede en Bimenes, va presentar el xueves, a les 19.30 hores, el segundu númberu de la so revista, ‘Brandal’.

Completa les actividaes de la Selmana Cultural pola Oficialidá del Asturianu, Víctor Suárez, d’Iniciativa pol Asturianu, que va poner la charra ‘Política llingüística y normalización. Derechos llingüísticos de normalización pa persones asturfalantes’ a les 18.30 hores. Yá de nueche, dende les 21.30 hores, va entamase un 'Bimenes en Danza' nel prau del Palaciu del Marqués de Casa Estrada, en Martimporra, col Grupu Folklóricu Los Yerbatos y La Bandina d’Oscarín.

Algaire y La Tarrancha

La plaza de la Casa Conceyu en Martimporra va acoyer l’actu institucional el sábadu pola XXVII Fiesta de la Oficialidá de la Llingua Asturiana cola presencia d’Helena Barril, alcaldesa de Miranda de l Douro, territoriu portugués hermanáu con Bimenes onde’l mirandés, llingua del tueru asturlleonés, tien reconocimientu institucional. Va ser al meudía y nel mesmu tamién va participar Fernández cola llectura del pregón.

La Danza pola Oficialidá y un pasucais del Ensame de Música Tradicional Los Yerbatos y de los Pauliteiros de Miranda de l Douro van preceder a la xira popular nel prau del palaciu, pa lo que ye necesario actuar siella enantes del miércoles na Casa Conceyu. La folixa va siguir de tarde con talleres de dellos deportes como tiru con arcu o llucha’l palu, una muestra de baltu y un conciertu, dende les 22.30 hores, d’Algaire y La Tarrancha.

Na semeya, un actu pol 8-M celebráu na Casa Cultura de Santuyano.