La candidatos reafírmense nel so posicionamientu sobre la oficialidá

Magar nun contar con un bloque específicu, como nel alderique eleutoral del 2019, la oficialidá del asturianu y del gallego-asturiano salió a debate nel cuartu, el dedicáu a los servicios públicos, y siguió nel quintu, ‘El día depués del 28-M’. Los siete candidatos reafirmáronse na convocatoria fecha por RTPA, y emitada esti miércoles en direuto, nos sos conocíos posicionamientos sobre esti derechu constitucional.

Foi nesti cuartu bloque cuando los moderadores Nacho Montserrat, direutor d’Informativos, y la periodista Natalia Alonso, sacaron el tema de la cultura, al que se-y dedicó mui pocu tiempu, menos d’un minutu. El presidente Adrián Barbón, nos segundos últimos de la so intervención –contaben con 3 minutos por estaya– foi’l primeru en falar del asturianu y de gallego-asturiano –sería tamién la so única referencia al asuntu– al apuntar –tolos candidatos emplegaron el castellanu en tou momentu, sacante dalguna frase d’Ovidio Zapico, de Convocatoria por Asturies– que “la nuesa apuesta pola identidá asturiana, pola cultura, pola llingua, les trés llingües que conviven n’Asturies, pola tradición y por supuesto pol so reconocimientu estatutariu y consitucional”.

Saltó nesi momentu Carolina López, de VOX, señalando que “ye increíble lo que diz vusté de les trés llingües, lo qu’hai n’Asturies son bables, qu’hai tantos bables como conceyos”, un mantra que repitiría en delles ocasiones ensin atopar respuesta de nengún de los candidatos. Namái Adrián Pumares, de Foro, y Cova Tomé, de Podemos, pidiríen respetu, pero nun llegaríen a valtar con argumentos la supuesta teoría ‘de los bables’.

Pumares, tamién dientro de la estaya de cultura, citó la política llingüística del Gobiernu de Barbón, calificando de “verdaderamente deceicionante’l trabayu fechu pola señora Berta Piñán”. Pela so parte, Manuel Iñara, de Ciudadanos, treslladó al llavianés y al candidatu del PP, Diego Canga, la entruga de si van apoyar l’asturianu y, en concreto pal popular, “si va siguir el modelu Feijoo sobre’l tema de la llingua gallega”.

Tomó la pallabra darréu Zapico, que rescampló que “la próxima llexislatura tien que ser la que reforme’l nuesu Estatutu d’Autonomía. ¿Pa qué? Pa cuatro cuestiones mui básiques: pa tener más autogobienu, pa tener más competencies asumíes, pa llograr un blindaxe social y pa dalgo mui cenciellu –momentu nel que camudó al asturianu– pa facer normal en política la que yá ye normal en sociedá como ye l’usu del asturianu. Polo tanto la oficialidá tien que ser una d’eses cuestiones que direutamente se vea reflexada nesa reforma del Estatutu. Yo creo –tornó al castellanu– qu’esa reforma que se mallogró por falta de lideralgu por parte del Gobiernu esta llexislatura, nun pue esperar más tiempu y tien que ser la próxima la que suponga qu’Asturies tenga un Estatutu non del 1983, sinón del sieglu XXI, del 2023”.

El quintu bloque

Llueu de la intervención de Zapico los moderadores recordaron que’l tema del Estatuta diba plantegase nel quintu bloque ‘El día depués del 28-M’. Sicasí, enantes López salió cola posibilidá de llevar un derechu a consulta al traviés d’un referéndum y dixo que “oficialidá ye imposición” y “la llingua ye un inventu” que “va cargase los bables”.

Pumares foi’l primeru en tomar la pallabra y aprovechó pa responder a Iñarra señalando “que la postura de Foro ye meridianamente clara. Nosotros defendemos que cualquier persona que quiera utilizar la llingua asturiana pueda facelo; otorgar a cualquier persona que quiera utilizar la llingua asturiana esi derechu, y amás coles consecuencies que tien esi derechu. Y tamién que cualquier persona que nun quiera utilizar la llingua asturiana en nengún casu pueda vese obligada a utilizala. Ésa ye la postura de Foro Asturias y creo sinceramente que ye la postura de la inmensa mayoría de la sociedá asturiana. Lo que nun voi tolerar tampoco son desprecios o volver a debates que yá se zarraron va un sieglu, faltando’l respetu a un patrimoniu de tolos asturianos como ye la llingua asturiana”.

Depués de delles cuestiones, y plantegada otra vuelta la reforma del Estatutu polos moderadores, Tové apuntó que se “perdió una bona oportunidá nel anterior exerciciu políticu” y afirmó que “impulsaremos esa reforma del Estatutu pa usar la nuesa norma principal pa reactivar la economía, pa blindar derechos sociales, pa tresferir competencies y, por supuesto, pa facer oficial l’asturianu y el gallego-asturiano, que yá los son na cai y lo tien que ser nes lleis”.

Nesi momentu dirixóse a López, citando unos versos de Manuel Asur que la valdesana tomó del cantar ‘La danza’ “del mio compañeru Xune Elipe, que toos conoceréis: Dicen que yo t’inventó porque te saco de casa y fáigome faladeru cuntando lo que nos pasa. Les coses que vusté dixo sobre’l bable son verdaderes barbaridaes. Espero que deprenda pa la próxima conversación”. López insistió nesi momentu colo ‘de los bables’ y Tomé nun entró a rebatir, mientres que’l restu de candidatos guardaron silenciu.

Iñarra insistió a Canga depués con que “sobre la oficialidá nun me respondió”. El popular respondió brevemente que “la reforma del Estatutu nun ye una prioridá pa nosotros. Señor Iñarra, nós tamos en contra de la oficialidá”.

La última en tocar el tema llingüísticu foi Tomé, que se comprometió a “ameyorar la vida n’Asturies y vamos facelo dende equí, con arguyu y dignidá, cola nuesa historia y nuesa xente, y coles nueses llingües”.

Na imaxe, Alonso, Canga, Tomé, López, Pumares, Iñarra, Barbón, Zapico y Montserrat. Semeya de RTPA.