L’alderique eleutoral de RTPA emítese nesta ocasión en direuto

|
Candidatos Alderique TPA

Esti miércoles va celebrase l’alderique eleutoral de les eleiciones nacionales del 28-M qu’entama RTPA cola novedá de que se va emitir en direuto. Con un llargor de dos hores, va dividise en cinco bloques y va contar cola participación de los candidatos de les sietes formaciones con representación na Xunta Xeneral.

Los estudios d’informativos de la RTPA tán preparaos pa recibir a Adrián Barbón (FSA-PSOE), Diego Canga (PP), Manuel Iñarra (Ciudadanos), Cova Tomé (Podemos), Ovidio Zapico (Convocatoria por Asturies), Adrián Pumares (Foro) y Carolina López (VOX). Dende ehí va emitise, a partir de les 22.30 hores, l’alderique eleutoral que va presentar Nacho Montserrat, direutor d’Informativos, y la periodista Natalia Alonso.

Tolos candidatos van tener un minutu de presentación y otru de pieslle de la so intervención, que van abrir, depués del sortéu fechu esta mañana, Zapico, y va zarrar, Pumares. Llueu van disponer del mesmu tiempu, un total de 3 minutos, en caún de los cinco bloques nos que se dividide l’alderique: economía y industria; infraestructures y tresportes; mundu rural y despoblación; servicios públicos; y ‘El día depués del 28-M’, nesi orde.

A diferencia del debate del 2019, cuando hebo ún dedicáu a la 'cultura, cooficialidá y reforma estatutaria’, nesta ocasión nun ta previsto tocar esti tema, anque ye más que posible que los candidates saquen esta cuestión nes sos intervenciones. L’alderique va poder siguise en direuto –nel 2019 foi imposible por cuestiones d'axenda de los políticos– tanto en TPA como en RPA.

Les conceyiles, na RPA

La radio autonómica va dedicar tamién programes a les eleiciones municipales. En concreto’l programa ‘Asturias al día’, que conduz Roberto Pato de llunes a vienres de 9 a 10 hores, va entamar alderiques colos candidatos a les alcaldíes d’Uviéu, Xixón, Avilés, Siero, Llangréu y Mieres, que van arrancar mañana col debate dedicáu al conceyu de la cuenca d’El Nalón.

Na semeya, imaxe promocional de RTPA del alderique eleutoral d'esta nueche.

Contador Estadistiques