Depués de Bruxeles y Roma, Londres

Asturies sigue promocionándose nos destinos con conexón aérea como destín turísticu.

'Hello London, you are 120 minutes away from paradise', o lo que ye lo mesmo, 'Hola Londres, tas a 120 minutos del paraísu', ye'l lema emplegáu na capital inglesa y que, adaptáu según el llugar, ta llevándose a tolos llugar onde se desenvuelve esta campaña. Primero foi Bruxeles, la selmana pasada Roma y güei foi'l turnu de Londres.

Cuarenta persones participaron nun actu entamáu nel restorán Hispania London pola Viceconseyería de Turismu pa presentar la ufierta turística del país en naturaleza, aventura y gastronomía, y dar a conocer les conexones aérees direute colos aeropuertos de Gatwick (Vueling) y Stansted (Ryanair). Presentes, periodistes de siete medios de comunicación y representantes de diez axencies de viaxe, ente otros profesionales.

"El Principáu ye un destín mui diferente al de la España que seguramente tienen en mente; compartimos un mesmu estilu de vida, pero disfrutamos d'un entornu privilexáu y d'una cultura única", dirixóse a ellos la viceconseyera Graciela Blanco. El cocineru Marcos Morán, de Casa Geraro y direutor gastronómico del restorante qu'acoyó l'actu, fixo un amuesa de productos gastronómicos del país.

Campaña nes estaciones de tren

L'actu coincidió cola campaña esterior qu'Asturies punxo en marcha en grandes intercambiadores de tresporte con llinia a los aeropuertos qu'operen vuelos a Santiagu'l Monte, como les estaciones de London Bridge o Victoria Station. La promoción va llevase a Liverpool la selmana próxima y va estendese tamién a revistes especializaes en turismu de naturaleza, medios dixitales y redes sociales. 

Na semeya, pantalla con promoción turística d'Asturies en Victoria Station.