Asturies promociónase en Bruxeles como un paraísu "a 110 minutos"

Raynair xune Bélxica col aeropuertu del país dende esta seronda con dos vuelos selmanales.

'Hello Brussels, you are 110 minutes from paradise' ye'l lema n'inglés tórnase como –'Hola Bruxeles, tas a 110 minutos del paraísu'– que rescamplaba sobre una imaxe de la mariña oriental na presentación d'esta mañana de la ufierta turística d'Asturies énte mediu centenar d'axentes y prescriptores del sector. Ye la primera de les presentaciones internacionales que les viceconseyeríes de Turismu y d'Infraestructures tienen previsto facer en mercaos internacionales cola fin de rentabilizar la coneutividá aérea nueva del país.

La viceconseyera de Turismu, Graciela Blanco, repasó na so intervención los nuesos activos turísticos principales, ente los que destacó “la so calidá medioambiental alta y la so singularidá paisaxística, que combina costa y monte”, amás del potencial pal turismu deportivu y d'aventura, y l'ecoturismu, cola peculariedá de ser el “abellugu onde habiten los osos pardos xabaces” n'Europa Occidental.

Pela so parte, Jorge García López, viceconseyeru d’Infraestructures, Movilidá y Territoriu, centró la so intervención nel legáu cultural reconocíu pola UNESCO como Patrimoniu Mundial, faciendo referencia al Prerrománicu, les cueves con arte rupestre paleolíticu y los itinerarios asturianos del Camín de Santiagu. Na cita celebrada nel restorán Hispania Brussels tamién se dio importancia a los trés núcleos urbanos más importantes, Xixón, Uviéu y Avilés, y a la gastronomía asturiana, ente otros atractivos.

Publicidá en tranvíes

Bélxica ye ún de los países que cuenten con conexón nueva col Aeropuertu d'Asturies dende esta temporada. La conexón apuerta al Aéroport de Charleroi Bruxelles-Sud, na población valona de Tchålerwè, asitiada a 61 quilómetros de Bruxeles.

La presentación d'esta mañana coincide con una serie d'aiciones que llevó la imaxe d'Asturies como destín turísticu a soportes publicitarios dixitales del aeropuertu de belga y a nos tranvíes de la capital belga.

Na semeya, Blanco na so intervención.