Asturies refuerza la promoción n'Alemaña como destín turísticu

Santiagu'l Monte tien conexón direuta nestos momentos con trés aeropuertos alemanes.

La empresa d'alministración d'eventos Spies und Schwarz Eventmanagement, con sede en Minga/München, acoyó esta tarde un actu pa presentar la ufierta natural y cultural d'Asturies énte un centenar de periodistes y operadores de la capital bávara cola fin d'atrayer viaxeros internacionales d'esti mercáu. Alemaña aporta más de 50.000 turistes al añu, un 12 por cientu del total de visitantes de fuera del Estáu, polo que'l Gobiernu va invertir 600.000 euros esti añu de promoción nesti país, lo qu'inclúi la participación en feries como ITB, l'entamu de viaxes pa operadores y medios de comunicación, una presentación en Frankfurt am Main y la campaña publicitaria que se desenvuelve nestos momentos na estación central de ferrocarril y nos autobuses urbanos de Minga/München. 

L'eventu, que contó cola presencia de Graciela Blanco, viceconseyera de Turismu, y el d'Infraestructures, Movilidá y Territoriu, Jorge García López, consistió nuna esperiencia inmersiva que simulaba un viaxe a Asturies n'avión, de mou que los asistentes pudieron adentrar nel paisaxe asturianu per aciu de vídeos en trés dimensiones. Darréu entamóse una preba de platos y productos del país de la mano de Jaime Uz, embaxador del sellu de calidá 'Cocina de Paisaxe' y cocineru del restorán Arbidel, asitiáu en Ribeseya.

Nesta temporada l'Aeropuertu d'Asturies tien conexón con Minga/München y Frankfurt am Main, operaes por Lufthansa, y con Düsseldorf-Weeze, por Ryanair. Nos meses previos el Gobiernu entamó aiciones de promoción asemeyaes a la de güei en Bruxeles, Roma, Londres, Dublín y Milàn, ciudaes coles que tamién hai vuelos direutos.